گوتەبێژی حکومەت: هەموو هەوڵێک دەدەین عێراق لە گۆڕەپانی شەڕ دووربخەینەوە

ئاڤا نیوز

 

گوتەبێژی حکومەتی عێراق دەڵێت، بەغدا لەسەر ئاستی هەرێمی و نێودەوڵەتی هەوڵەکانی بۆ ڕاگرتنی گرژییەکانی ناوچەکە بەردەوامە، جەختیش دەکاتەوە کە هەموو هەوڵێک دەدەن عێراق لە گۆڕەپانی شەڕ دووربخەنەوە.

 

وێنە گەرەکە: لەگەڵ بەردەوامی هێرشەکانی ئیسرائیل بۆسەر لوبنان و هێرشەکانی بەرەی مقاوەمەی عێراق بۆسەر تەلئەڤیڤ، تادێت مەترسی هێرشی ئاسمانی ئیسرائیل بۆسەر گرووپە چەکدارەکانی عێراق زیاتر دەبێت، ئەوەش وایکردووە حکومەتی فیدراڵ ڕێکاری ئەمنیی بگرێتەبەر وەک ئامادەکارییەک بۆ هەر نائارامییەک کە وڵات بگرێتەوە.

 

لێدوانی فەرمی: باسم عەوادی، گوتەبێژی حکومەتی فیدراڵ بە میدیای فەرمی عێراقی ڕاگەیاندووە، حکومەت لەسەر ئاستی ناوخۆ، هەرێمی و نێودەوڵەتی لە هەوڵەکانی بەردەوامە تا وڵات لە شەڕ دووربخاتەوە، چونکە ئەوە بڕیاری فەرمی دەوڵەتە و بەرژەوەندیی باڵای عێراقیش دەپارێزێت.

 

ئاماژەی بەوەشکردوە، حکومەت پەیامی بۆ هەموو لایەنە ناوخۆیی و دەرەکییەکان ناردووە و تیایدا جەختیکردووەتەوە کە هەر نائارامییەک وڵاتەکە بگرێتەوە لەڕووی سیاسی و ئابوریی و کۆمەڵایەتییەوە کاریگەریی نەرێنی دەبێت، لەگەڵ ئەوەشدا لەڕووی سیاسی، هاوکاری مرۆیی و میدیاییەوە عێراق یەکەم دەوڵەتی ئیسلامییە لە پشتیوانیکردنی دۆزی فەڵەستین و لوبنان.

 

لەلایەکی دیکەوە: بە گوتەی گوتەبێژی حکومەت، هەموو ڕێکارێکی ئەمنی و سەربازیی بۆ پاراستنی سەروەری عێراق گیراوەتەبەر، هاوکات بەغدا ڕەخنەش لە هەوڵە نێودەوڵەتییەکان دەگرێت کە نەیانتوانییوە شەڕی ناوچەکە بوەستێنن و پڕۆژەی جێگرەوە بۆ چارەسەری سەربازی پێشکەش بکەن.