د.ئیحسان شەممەری: عێراق سەرکەوتوو نەبووە لەوەی ململانێکان لەخۆی دووربخاتەوە

ئاڤا نیوز 

 

سەرۆکی سەنتەری هزری سیاسی لە عێراق پێیوایە حکومەتی عێراق شکستی هێناوە لەوەی نەبێتە بەشێک لەو ململانێیەی ناوچەکەی گرووتەوە و نەیتوانیوە کۆنترۆڵی گرووپە چەکدارییەکان خۆی بکات و بە دووریشی نابینێت ئیسرائیل هێرشی ئاسمانی بکاتە سەر عێراق.

 

لێدوانی فەرمی: د.ئیحسان شەممەری، سەرۆکی سەنتەری هزری سیاسی لە عێراق لە میانی بەشداریکردنی لە گەشتی هەواڵەکانی کاتژمێری 09:00ی ئاڤا میدیا لەبارەی هۆشدارییەکەی سەرۆکوەزیرانی عێراق بۆ ئەو دۆخەی ناوچەکەی گرتووەتەوە، ڕایگەیاند: بەشداری گرووپە چەکدارییەکانی هاوپەیمانی ئێران لە غەززەو تەنانەت لە باشووری لوبنان بێگومان ئەوەمان پێدەڵێت عێراق هەنگاو بەرەو بەشداریکردن دەنێت لە ڕێگەی ئەو بڕیار و ئیرادەیەی کە هیچ پەیوەندییەکی بە حکومەتی عێراقییەوە نییە.

 

کاریگەریی و لێکەوتەکان: پەیامەکەی سەرۆکوەزیران گوزارشت بوو لەو نیگەرانییە زۆرەی کە ئیسرائیل جوگرافیای عێراق بکاتە ئامانج، بە بڕوای من بڕیای شەڕ کە گرووپە چەکدارەکان داویانە، لە دەرەوەی چوارچێوە دەستوورییەکانەوە دراون. هەبوونی ئەو ئیرادەیەش بە بڕوای من عێراق پاڵ دەنێت بۆ ململانێیەکی زۆر قووڵ. ئیحسان شەممەری وا دەڵێت.

 

ئەوەی پێشبینی دەکرێت: ئیحسان شەممەری پێشبینی وەڵامدانەوەی ئیسرائیل بۆ گرووپە چەکدارەکانی عێراق لەسەر سێ ئاست دەکات و دەڵێت: "یەکەمیان سنووردار دەبێت لە ڕێگەی وەشاندنی چەند گورزێک بۆسەر چەند پێگەو بارەگاو تەنانەت کۆگای چەک و تەقەمەنی. دووەم، گورزەکان گرووپە چەکدارەکان و سەرکردەکانیان بکاتە ئامانج ئەوانەی لە عێراق پاڵپشتیان دەکەن". سێیەمیشیان کە بەدووری دەزانێت ڕووبدات، "بەڵام ئەگەری هەیە گرووپە چەکدارییەکان و دامەزراوەکانی حەشدی شەعبی و هەندێک دامەزراوەی سڤیل بکاتە ئامانج".

 

پێدراوە ڕاستییەکان: بە گوتەی ئیحسان شەممەری حکومەتی عێراق هەوڵی ئەوەی داوە بۆ ئەوەی نەبێتە بەشێک لەو ململانێیە، بەڵام هەوڵەکانی حکومەت لەوبارەیەوە لە ڕابردوو شکستی هێناوە، پێویست بوو حکومەتەکەی سوودانی بەو پێیەی هاوپەیمانی ئەو گرووپە چەکدارانەیە کۆنترۆڵیان بکات، بەڵام دەستی ئەو گرووپانە کراوە بووە، چەندین جار هێرشیان کردووەتە سەر بەرژەوەندییەکانی ئەمریکا و هەرێمی کوردستان بەبێ ئەوەی هیچ کاتێک دەستگیریان بکەن و لێپرسینەوەیان لەگەڵ بکرێت.