پلانی ساختەکارییەکی گەورەی یەکێتی لە بەغدا بۆ دەنگدان ئاشكرا دەبێت

ئاڤا نیوز

بافڵ تاڵەبانی، سەرۆکی یەکێتی لە بەغدا ساختەکارییەکی گەورەی بۆ ڕۆژی دەنگدان کردووە، کارتی دەنگدانی بۆ 100 هەزار ئەندامی حەشدی شەعبی دەرکردووە و بەکاریان دەهێنن دەنگ بە یەکێتی بدەن.

وێنە گەورەکە: لە بەغداوە فێڵ و ساختەکارییەکی گەورەی یەکێتیی نیشتمانیی کوردستان لە ئێستاوە بۆ هەڵبژاردن ئاشکرا دەبێت، هەریەک لە ڕەیان کلدانی و قەیس خەزعەلی کە دوو  فەرماندەی حەشدی شەعبین و لە لیستی تیرۆر و سزادراوەکانی ئەمریکان، پاڵپشتی ساختەکارییەکانی یەکێتی دەکەن و کاریان بۆ کردووە.


زانیاریی تایبەت: سەرچاوەیەک لە بەغداوە بە ئاڤا میدیای ڕاگەیاند: "بە پشتیوانی ڕەیان کلدانی، ئەمینداری گشتیی بزووتنەوەی بابیلوون و قەیس خەزعەلی، ئەمینداری گشتی عەسائیبی ئەهلی حەق، 100 هەزار کەسی سەر بە حەشدی شەعبی کارتی ساختەیان بۆ دەرکراوە و لە ڕۆژی دەنگدان بەکاریان دەهێنن دەنگ بە یەکێتی بدەن، لە شوێنی ئەو کەسانەی کە ناچن بۆ دەنگدان".


ئەوەی پێویستە بیزانیت: بەو 100هەزار دەنگدەرەی کە بە ساختە بۆ یەکێتی دروستکراون، ئەو حیزبە لە سلێمانی دەتوانێت حەوت بۆ هەشت کورسی بەدەست بێنێت و ڕێژەی دەنگەکانیشی زیاد بکات.

زانیاریی زیاتر: لە بەغداوە کارتی نیشتمانی ئەو 100 هەزار کەسە بۆ سنووری پارێزگاکانی سلێمانی و هەڵەبجە گۆڕدراوە و بەسەر شارەکانی ئەو سنوورە دابەشکراون بۆ دەنگدان.

ئەوەی لەبارەیەوە دەگوترێت: لەبەرامبەر ئەو کارە، لە پارێزگای سلێمانی شووقە و زەوی و پارە بەو کەسانە دراوە.