پووتین و پزیشکیان لە تورکمانستان کۆدەبنەوە

ئاڤا نیوز

 

بە پێی ڕاگەیێنراوێکی یوری ئوشاکۆڤ، ڕاوێژکاری سەرۆکایەتی ڕووسیا، ڤلادیمێر پوتین، سەرۆککۆماری ڕووسیا ڕۆژی هەینی لە میانەی کۆڕبەندێکدا لە تورکمانستان لەگەڵ مەسعوود پزیشکیان، هاوتا ئێرانییەکەی کۆدەبێتەوە.

 

وێنە گەورەکە: ئەم کۆبوونەوەیە لە دوای زیادبوونی گرژییەکانی نێوان ئیسرائیل و ئێران دێت، بە گوێرەی زانیارییەکانی ئەو ڕاوێژکارە هەردوو سەرۆکە لە عیشق ئاباد کۆدەبنەوە و پرسە هەنووکەییەکانی ڕۆژهەڵاتی ناوەڕاست تاوتوێ دەکەن.

 

ئەوەی پێویستە بیزانیت: پوتین لە لایەن دادگای تاوانە نێودەوڵەتییەکانەوە فەرمانی دەستگیرکردن لە دژی دەرچووە، بڕیارە لەسەر بانگهێشتی دەسەڵاتدارانی ئەم وڵاتە ئاسیای ناوەڕاست بەشداری لە کۆڕبەندێکی ناوچەیی لە تورکمانستان بکات.

 

زانیاریی زیاتر: ڕۆژئاوا ئێران بەوە تۆمەتبار دەکات کە فڕۆکەی بێفڕۆکەوانی هێرشبەری شەهید و مووشەکی کورتمەودای بۆ ڕووسیا دابین کردووە، بەمەش هاوکاریی سوپای ڕووسیا لەهێرشکردنە سەر ئۆکراینا دەکات، تاران ئەو تۆمەتانە ڕەتدەکاتەوە.

 

ئەمەش بزانە: پزیشکیان بڕیارە لە مانگی ئۆکتۆبەری ئەمساڵدا لە میانەی سەردانەکەیدا بۆ ڕووسیا بۆ بەشداریکردن لە لوتکەی بریکس چاوی بە ڤلادیمێر پوتین بکەوێت.