کاردانەوەی لایەنەکان لەبارەی تۆمارە دەنگییەکەی بافڵ تاڵەبانی و قوباد تاڵەبانی

ئاڤا نیوز

ئاڤا میدیا لەبارەی تۆمارە دەنگییەکەی بافڵ تاڵەبانی و قوباد تاڵەبانی کە ئەمڕۆ سێشەممە لیژنەی هەڵبژاردنی پارتی بڵاویکردەوە، قسە لەگەڵ لایەنە سیاسییەکان دەکات و هەڵوێستیان ئاشکرا دەکات.

ئەوەی پێویستە بیزانیت: بافڵ تاڵەبانی، سەرۆکی یەکێتی لە تۆمارە دەنگییەکەدا سووکایەتی و بێڕێزی بە بنەماڵەی شەهیدان و هێزی پێشمەرگەی کوردستان دەکات و پێیان دەڵێت: پێویستمان بە دەنگی هیچ خوێڕییەکیان نییە و ئەوانە دەنگ بە لاهور جەنگی دەدەن.

بۆچوونی لایەنی بەرامبەر: لاهور شێخ جەنگی، سەرۆکی بەرەی گەل دەڵێت: قسەکانی ناو تۆمارە دەنگییەکەی قوباد و بافڵ لە دانیشتنە تایبەتەکانی خۆیان دەیکەن و زۆر بێمنەتن بەرامبەر بە خەڵک.


هەڵوێستی لایەنە سیاسییەکان بەمشێوەیە:

پارتی: پیلانێکی ناشرینە لەلایەن دوو هەڵتۆقیو دژی کوردستان.

یەکێتی: تۆمارە دەنگییەکە ڕەتدەکەینەوە و ساختەیە، لە دادگا سکاڵا تۆمار دەکەین.

گۆڕان: یەکێتی مەگەر بەو فێڵەی باسکراوە بتوانێت 30 کورسی بهێنێت، دەبێت کۆمیسیۆن بەرپرسیارێتی هەڵبگرێت.

بەرەی گەل: باوەرمان بە ڤیدیۆی تۆمارە دەنگییەکە نییە، بەڵام لە ناوەڕۆکی دڵنیایین، چونکە ئەم دووانە بەردەوام لە دانیشتنەکانیان ئەم قسانە دەکەن، بافڵ و قوباد تاڵەبانی هیچ منەتیان بە کەسوکاری شەهیدان و پێشمەرگەی دێرین نییە.

ڕەوتی هەڵوێست: تیمی خۆمان بۆ لێکۆڵینەوە لە تۆمارە دەنگییەکە ڕادەسپێرین و دواتر هەڵوێستی خۆمان لەمبارەیەوە ڕادەگەیێنین.

کۆمەڵی دادگەری: ئەگەر ئەم تۆمارە دەنگییە ڕاست بێت، مەترسییە و دەبێت ڕێگری لێبکرێت، دەبێت کۆمیسیۆن ڕێگری لێ بکات.

نەوەی نوێ: کۆمیسیۆن لەبەردەم بەرپرسیارێتییەکی گەورەدایە، ئێمەش زانیاریمان لایە لەبارەی ئامادەکارییەکانی یەکێتی بۆ ئامادەکردنی پێشوەختەی سندووقی دەنگدان بەتایبەتی بۆ ڕۆژی دەنگدانی تایبەت.

 

باکگراوند: ئەمڕۆ سێشەممە پارتی لەبارەی ساختەکارییەکانی یەکێتی لە پرۆسەی هەڵبژاردنی پەرلەمان کوردستان پەیامێکی دەنگی نێوان بافڵ تاڵەبانی و قوباد تاڵەبانی بڵاوکردەوە، لە پەیوەندییەکەدا بافڵ بە قوباد دەڵێت: لە بەغدا 30 کورسییان بە لایەنی کەمەوە بۆ ئێمە زامن کردووە.