نەوەی نوێ: زانیاریمان لەبارەی هەوڵی یەکێتی بۆ ساختەکاری هەیە

ئاڤا نیوز

 

لە کاردانەوەی تۆمارە دەنگییەکەی بافڵ تاڵەبانی و قوباد تاڵەبانی، سەرۆکی فراکسیۆنی نەوەی نوێ لە پەرلەمانی عێراق دەڵێت 'کۆمیسیۆنی باڵای سەربەخۆی هەڵبژاردنەکانی عێراق لەبەردەم بەرپرسیارێتییەکی گەورەدایە'.

 

لێدوانی فەرمی: سروە عەبدولواحید، سەرۆکی فراکسیۆنی نەوەی نوێ لە پەرلەمانی عێراق، ڕایگەیاند: لەبارەی ئامادەکارییەکانی یەکێتی بۆ ئامادەکردنی پێشوەختەی سندووقی دەنگدان، بەتایبەتی بۆ ڕۆژی دەنگدانی تایبەت، ئێمە زانیاریمان پێ دەگات. دەشڵێت: کۆمسیۆنی باڵای هەڵبژاردنەکان لەبەردەم بەرپرسیارێتییەکی گەورەدایە.

 

لەلایەکی دیکەوە: نەوەی نوێ هۆشداری بە کۆمسیۆنی باڵای سەربەخۆی هەڵبژاردنەکانی عێراق دەدات، لە ئەگەری پابەند نەبوون بە بڕیارەکانی دەستەی دادوەریی تایبەت بە دەنگدانی تایبەت و ژماردنی دەنگەکان بەدەست و لەکارنەخستنی ئامێرەکانی دەنگدان و بردنە ژوورەوەی مۆبایل بۆ شوێنی دەنگدان.

باکگراوند: ئەمڕۆ سێشەممە لیژنەی باڵای هەڵبژاردنی پارتی تۆمارێکی دەنگی بڵاوکردەوە، تێیدا بافڵ تاڵەبانی باس لە زامنکردنی 30 کورسی لە بەغداوە بۆ حیزبەکەی دەکات، هاوکات سووکایەتی بە کەسوکاری شەهید و پێشمەرگە دەکات و بە 'خوێڕی'ی ناویان دەبات.