گۆڕان: یەکێتی مەگەر بەو فێڵەی باسکراوە 30 کورسی بهێنێت

ئاڤا نیوز

 

تۆمارە دەنگییەکەی بافڵ تاڵەبانی، سەرۆکی یەکێتی و قوبادی تاڵەبانی برای کاردانەوەی زۆری بەدوای خۆیدا هێنا، بەتایبەت لەسەر ئەوەی گوایە 30 کورسی پەرلەمانیان لە بەغدا بۆ زامن کراوە، ئەندامێکی جڤاتی گشتیی گۆڕانیش دەڵێت "مەگەر بەو فێڵەی باسکراوە بتوانن ئەو کورسیانە بهێنن".

 

لێدوانی فەرمی: دڵشاد ڕەشید، ئەندامی جڤاتی گشتیی گۆڕان بە ئاڤا نیوزی گوت: "زۆر عەیبە بەئاشکرا و ڕوونی باس لەو بابەتە دەکەن و عەیبەیە، ئەمە وات لێ دەکات هەڵبژاردن ڕەتبکەیتەوە، چونکە 30 کورسی بە یەکێتی درابێت، هەڵبژاردنمان بۆچییە؟".

 

کاریگەری و لێکەوتەکان: ئەو ئەندامەی جڤاتی گشتیی گۆڕان دەشڵێت: "ئەم بابەتە گومان لەسەر کۆمیسیۆن دروست دەکات، پێویستە بە کاری یاسایی خۆی هەستێت و هەڵبژاردن بە پاکی بەڕێوەببات".

 

ئەوەی پێشبینی دەکرێت: بەگوتەی دڵشاد ڕەشید: "مەگەر بەو فێڵەی باسکراوە یەکێتی 30 کورسی بهێنێت، ئەگەرنا هەر پێنج بۆ شەش کورسی دەهێنێت".

 

باکگراوند: ئەمڕۆ سێشەممە لیژنەی باڵای هەڵبژاردنی پارتی تۆمارێکی دەنگی بافڵ تاڵەبانی و قوباد تاڵەبانی برای بڵاوکردەوە، تێیدا سووکایەتی بە پێشمەرگە و کەسوکاری شەهیدان دەکەن و، باس لە زامنکردنی 30ـی پەرلەمانی دەکەن لە هەڵبژاردنی پەرلەمانی کوردستاندا.