ئەردۆغان دڵنیایی دەداتە هاووڵاتییانی وڵاتەکەی

ئاڤا نیوز

 
رەجەب تەیب ئەردۆغان، سەرۆککۆماری تورکیا دوای ئەوەی لە وتارێکیدا باسی لەوە کرد کە ئیسرائیل ناوەستێت و خاکی تورکیاش دەکاتە ئامانج. ئۆزگور ئۆزێل، سەرۆکی جەهەپە کە پارتێکی ئۆپۆزسیۆنە داوای لە ئەردۆغان کرد لە پەرلەمانی تورکیا ئەو بابەتە ڕوون بکاتەوە.

 

وێنە گەورەکە: لە بەردەوامی ‌گرژییەکانی ڕۆژهەڵاتی ناوەڕاست و پەرەسەندنی شەڕی ئیسرائیل لەگەل حەماس و حیزبوڵڵا، ترسی بە ئامانجگرتنی خاکی تورکیا لەلایەن ئیسرائیلەوە نیگەرانی هاووڵاتییانی ئەو وڵاتەی لێکەوتووەتەوە، پارتە ئۆپۆزسیۆنەکانی ئەو وڵاتەش قسەکانی ئەردۆغان بە بێ بنەما ناو دەبەن و داوای پشتڕاستکردنەوەی قسەکانی دەکەن.

 

لێدوانی فەرمی: ئەردۆغان داوای لە پارتە سیاسیەکان کرد لەو پرسە یەک دەست کاربکەن و گوتی: "هاووڵاتیانمان لە هەموو جۆرە مەترسیەکی ئیسرائیل بۆ سەر تورکیا دەپارێزین و با هاووڵاتیان بە ئاسوودەیی لەسەر شەقامەکان بێ ترس بسوڕێنەوە".

 

بۆچوونی لایەنی بەرامبەر: ئۆزگور ئۆزێل، سەرۆکی پارتی جەهەپە گوتی: ئەردۆغان ئەم قسانەی بۆ پەردەپۆش کردنی پرسە هەنوکەییەکانی خراپی دۆخی ئابووری و دۆخی تورکیا وروژاندووە، ئەگەر ڕاست دەکات با سەچاوەیی زانیاریەکەی ئاشکرا بکات.

 

ئەوەی ئێستا ڕوودەدات: تا دێت گرژییەکانی نێوان ئیسرائیل و تورکیا زیاتر دەبێت، دوای لایەنگرییە بەردەوامەکانی ئەردۆغان بۆ حەماس،  ئەمەش ترسی هێرشی ئیسرائیل بۆ سەر تورکیا زیاتر دەکات، تایبەت دوای ئەوەی نەتەنیاهۆ هێرشەکانی بۆ سەر لوبنان دەستپێکرد و هەڕەشە لە سوریا و عێراق دەکات.