بەقاچاخبردنی ئاژەڵ لە عێراقەوە بۆ وڵاتانی دراوسێی نرخی گۆشتی سوور بەرز دەکاتەوە

ئاڤا نیوز 

 

نرخی گۆشتی سوور لە زۆربەی وڵاتانی جیهان و عێراق بە هەرێمی کوردستانیشەوە بەشێوەیەکی بەرچاو بەرزبووەتەوە، ئێستا ئەو کێشەیە نێودەوڵەتییە و هۆکارەکەی بۆ گرانبوونی نرخی ئالیکی ئاژەڵ دەگەڕێتەوە، هاوکات سەرەڕای ئەم کێشەیە لە عێراقەوە مەڕ بە قاچاخ هەناردەی وڵاتانی سعودیە و ئوردن دەکرێت. 

 

وێنە گەورەکە: لە عێراق نرخی هەر کیلۆیەک گۆشتی سوور لە 16 هەزار دینارەوە بەرزبووەوە بۆ 23 هەزار دیناری عێراقی، حکومەتی عێراق چەند ڕێوشوێنێکی گرتووەتەبەر، بەڵام سوودی نەبووە، لە هەرێمی کوردستانیش ئەم کێشەیە سەری هەڵداوە، بەڵام کێشەکە دەگەڕێتەوە بۆ کەمی هاوردەکردنی بەهۆی بەرزبوونەوەی نرخەکەی. 

 

لێدوانی فەرمی: ساماڵ عەبدولڕەحمان، بەڕێوەبەری گشتیی گومرگەکانی هەرێمی کوردستان لەمبارەیەوە بۆ ئاڤا نیوز زانیاری خستەڕوو و گوتی: 

• کێشەی بەرزبوونەوەی نرخی گۆشتی سوور نێودەوڵەتییە، هۆکارەکەی بۆ بەرزبوونەوەی نرخی ئالیک و پێداویستییەکانی بەخێوکردنی ئاژەڵ دەگەڕێتەوە. 

• ئێمە وڵاتێکی هەناردەکارنین، هاوردەکارین، چونکە ڕێژەکە لە پێداویستی ناوخۆ کەمترە، لاریمان نییە لەسەر هاوردەکردنی ئاژەڵ بەشێوەیەکی یاسایی. 

• ئێستا ڕێژەی هاوردەکردن بەهۆی بەرزبوونەوەی نرخی ئاژەڵ کەمی کردووە، نرخی گۆشت لە بازاڕەکانی هەرێمی کوردستان کەمی کردووە. 

 

لەلایەکی دیکەوە: بەرپرسێکی خۆجێیی پارێزگای ئەنبار هۆکاری لەناکاو بەرزبوونەوەی نرخی گۆشتی سووری لە عێراق ئاشکرا کرد و دەڵێت: بەشێوەیەکی فراوان بە ئاگاداری و هەماهەنگی کەسانی باڵادەست مەڕ بەقاچاخ ڕەوانەی سعودیە و ئوردن دەکرێت.