هەڤاڵ ئەبوبەكر: لە هەردوو ماڵەكەی گۆڕان بێبەریم

ئاڤا نیوز

 

هەڤاڵ ئەبوبەكر، پارێزگاری سلێمانی بێبەریبوونی خۆی لە هەردوو بەرەكەی بزووتنەوەی گۆڕان ڕادەگەیێنێت و دەڵێت، لەمڕۆوە بێلایەنم.

 

بۆچی گرنگە: شەوی ڕابردوو دانا ئەحمەد مەجید، ڕێکخەری گشتیی بزووتنەوەی گۆڕان بەوەکالەت کشانەوەی بزووتنەوەکەی لە حکومەتی هەرێمی کوردستان و حکومەتی خۆجێی ڕاگەیاند.

 

بڵاوكراوەی فەرمی: هەڤاڵ ئەبوبەكر، پارێزگاری سلێمانی لە ڕوونكردنەوەیەكدا دەڵێت: بۆ جاری سێیەم و کۆتایی، داوا لە حکومەتی هەرێمی کوردستان دەکەم بەخشینمان لە پۆستی پارێزگاری سلێمانی پەسەند بکات.

 

لەلایەكی دیكەوە: هەڤاڵ ئەبوبەکر، ئاماژە بەوە دەكات لەمڕۆوە، وەک کەسێکی تەکنۆکرات و بێلایەن لە ئەرکەكەی بەردەوام دەبێت تا ئەو کاتەی بەخشینەکەی پەسەند دەکرێت، یان ڕێکارێکی یاسایی و کارگێڕیی دەگیرێتەبەر بۆ دەستاودەستی پۆستەکەی لەگەڵ هەر پاڵێوراوێکی دیكە.

 

زانیاریی زیاتر: وەك خۆی لە ڕوونكردنەوەكەدا باسی دەكات، هەڤاڵ ئەبوبەكر، پێشووتر دوو جار لە دوو كاتی جیاواز بەفەرمی داوای بەخشینی لە پۆستی پارێزگاری سلێمانی كردووە، بەڵام پەسەند نەكراوە.

 

زانیاریی بەدەستهاتوو: دوای بڕیاری کشانەوەی بزووتنەوەی گۆڕان لە حکومەت ئاوات شێخ جەناب، وەزیری دارایی وەک یەکەم وەزیر و بەرپرسی گۆڕان پابەندبوونی خۆی بە بڕیارەکەی بزووتنەوەکە ڕاگەیاند و گوتەبێژی وەزارەتی داراییش بە ئاڤای ڕاگەیاند، ئاوات شێخ جەناب پێشتریش سێ جار داوای دەستلەکارکێشانەوەی پێشکەش کردووە، نەوەک تەنیا لە حکومەت، بەڵکو بەتەواوی واز لە کاری حیزبی و بزووتنەوەی گۆڕان دەهێنێت.

 

باکگراوند: بزووتنەوەی گۆڕان بەسەر دوو بەرەدا دابەش بووە، بەرەیەكیان لەلایەن كوڕانی نەوشیروان مستەفاوە سەرپەرشتیی دەكرێت و لە گردی زەرگەتەی سلێمانی ماونەتەوە و بەرەكەی دیكەش، لەلایەن دانا ئەحمەد مەجید، ڕێكخەری نوێی بزووتنەوەكە سەرپەرشتی دەكرێت و بارەگاكەی لە گەڕەكی كوردساتە لە سلێمانی.