لە بابل شوێنەوارێکی سەردەمی ساسانییەکان دەدۆزرێتەوە

ئاڤا نیوز 

 

لە پارێزگای بابل ناوچەیەکی شوێنەواری و چەندین پارچە شوێنەواری سەردەمی ساسانییەکان دۆزرانەوە، لە بەغداش تۆڕێکی بازرگانیکردن بە شوێنەوار دەستگیرکران.

 

وێنە گەورەکە: تیمێکی تایبەتی پشکنینی شوێنەوار توانییان لە ناوچەیەکی گوندنشینی بابل, ناوچەیەکی شوێنەواریی نوێ بدۆزنەوە، کە مێژووەکەی بۆ سەردەمی ساسانییەکان دەگەڕێتەوە .

 

لێدوانی فەرمی: سوهەیل تەمیمی، بەڕێوەبەری بەشی پشکنین و شوێنەواری لە وەزارەتی ڕۆشنبیری، بە ئاڤا نیوزی ڕاگەیاند: تیمەکە پاشماوەی چوار یەکەی بیناسازیی دۆزیوەتەوە کە بە قوڕ دروستکراون، مێژووەکەیان دەگەڕێتەوە بۆ سەردەمی ساسانییەکان.

 

زانیاریی زیاتر: لە هەمان ناوچەدا 170 پارچەی ئاسەواری جۆراوجۆر دۆزراونەتەوە، کە پێکهاتوون لە گۆزە، قاپ، کوپە و شووشە، کە مێژووەکەیان دەگەڕێتەوە بۆ هەمان سەردەمی ساسانییەکان.

 

له‌لایه‌كی دیكه‌وه: بەڕێوەبەرایەتیی هەواڵگری و لێكۆڵینەوەی فیدراڵی عێراق، تۆڕێکی بەقاچاخبردن و فرۆشتنی شوێنەوار لەبەغدا دەستگیر دەکەن، کە لە هەوڵی بەقاچاغبردنی 12 پارچە شوێنەواری کۆن بوون.