سەرۆکوەزیران بارزانی سەرسامی بەرامبەر کۆمەڵگەی پەروەردەیی بارزانی نەمر دەردەبڕێت

ئاڤا نیوز

سەرۆکوەزیران مەسرور بارزانی لەکاتی کردنەوەی کۆمەڵگەی پەروەردەیی بارزانی نەمر لە شاری هەولێر سەرسامی خۆی بە شێوازی بنیاتنان و دروستکردنی کۆمەڵگەکە دەربڕی و گوتی، لەو باوەڕەدا نەبووم بەمشێوەیە دروستکرابێت، جێگەی دەستخۆشی و شانازییە. جەختیشی کردەوە لە پەرەپێدان بە کەرتی پەروەردە و خوێندن بەردەوام دەبن.

 

وێنە گەورەکە: ئەمڕۆ یەکشەممە بە ئامادەبوونی سەرۆکوەزیران مەسرور بارزانی و وەزیری پەروەردە و کۆمەڵێک بەرپرسی باڵای حکومەت، کۆمەڵگەیی پەروەردەیی بارزانیی نەمر لە هەولێر کرایەوە.

 

ئەوەی پێویستە بیزانیت: کۆمەڵگەکە لەسەر ڕووبەری 12 هەزار مەتر دووجا دروستکراوە، خوێندن تێیدا بەخۆڕایی و بە هەردوو زمانی کوردی و ئینگلیزییە، ساڵانە هەزار قوتابی لە ڕێگەی هەڵسەنگاندنی پێشوەختە وەردەگیرێن، خوێندن لە باخچەی ساوایان دەستپێدەکات تاوەکو پۆلی 12ی ئامادەیی.

 

لێدوانی فەرمی: سەرۆکوەزیران مەسرور بارزانی لە وەسفی کۆمەڵگەکەدا ڕایگەیاند: "لەو باوەڕەدا نەبووم کۆمەڵگەی پەروەردەیی بارزانی نەمر بەمشێوە پێشکەوتووە دروستکرابێت، بەشێوەیەکی هاوچەرخ و سەردەمی دروست کراوە و جێی دەستخۆشی و شانازییە. لە چەندین بەشی جۆراو جۆر پێکهاتووە و ڕەچاوی لایەنەکانی ژیانی تێدا کراوە، سیستمی ئاگرکوژێنەوە دانراوە و ڕێژەیەکی باشی سەوزایی بۆ تەرخان کراوە".

 

لەلایەکی دیکەوە: سەرۆکوەزیران مەسرور بارزانی گوتی: "بە پێویستمان بە دروستکردنی قوتابخانەی زیاترە بۆ ئەوەی بتوانین کەرتی پەروەردە پێشبخەین".  جەختیشی لەسەر بەردەوامبوون پەرەدان بە کەرتی پەروەردە و فێرکردن کردەوە.

ئەمەش بزانە: کۆمەڵگەکە کتێبخانەیەک بە چوار هەزار سەرچاوە، دوو یاریگەی وەرزشی و کافتریا، پارک، هۆڵی سیمینار، هۆڵی شانۆ، هۆڵی سینەما و مۆسیقا لەخۆدەگرێت.