مەرد عەلی خاڵە: قوباد تاڵەبانی پشتیوانی دارایی ئەو ڕێکخراوانە دەکات کە هانی تێکدانی خێزان دەدەن

ئاڤا نیوز

 

کاندیدێکی پارتی لە سنووری بازنەی سلێمانی ڕایگەیاند، یەکەم کاری لە پەرلەمانی کوردستان پرۆژەیاسایەک دەبێت بۆ قەدەغەکردنی هەموو ئەو ڕێکخراوانەی هانی تێکدانی خێزان و پشتیوانی لە گرووپە لادەرەکان دەکەن لە کۆمەڵگە. 

 

وێنە گەورەکە: ژمارەیەک ڕێکخراو لە سنووری پارێزگاکانی سلێمانی و هەڵەبجە کار لەسەر شێواندنی شیرازەی خێزان و پشتیوانی لە گرووپە لادەرەکان دەکەن لە کۆمەڵگە، بەگوێرەی بەدواداچوونی کاندیدێکی پارتی لەلایەن قوباد تاڵەبانییەوە پشتیوانی دارایی دەکرێن.

 

لێدوانی فەرمی: مەرد عەلی ڕەسووڵ خاڵە، کاندیدی پارتی لە بازنەی سلێمانی ڕایگەیاند: لە میانی گەڕانم و گفتۆگۆکانم لەو ماوەیەی خۆم کاندید کردووە مەسەلەی خێزان و پاراستنی داواکاریی هەموو لایەک بووە لە ئەندامانی هەموو حیزبەکان بە یەکێتیشەوە، لای من خێزان لە حیزبایەتی گەورەترە، بۆیە بڕیارم داوە یەکێک لە کارە هەرە لە پێشینەکانم بریتی بێت لە پرۆژەیاسایەک بۆ قەدەغەکردنی هەموو ئەو ڕێکخراوانەی هانی تێکدانی خێزان و پشتیوانی لە گروپە لادەرەکان دەکەن لە کۆمەڵگە. 

 

مەرد عەلی خاڵە دەشڵێت: دوای بەدواداچوونم دەرکەوتووە زۆربەی ئەو ڕێکخراوانە لەلایەن قوباد تاڵەبانییەوە پشتیوانی دارایی دەکرێن، دڵنیام خەڵکانی یەکێتیش دژی ئەوەن خێزانەکانیان وەک کۆمەڵگەکانی دەرەوە تێکبچێت.

لەلایەکی دیکەوە: ئەو کاندیدەی پارتی دەپرسێت: قبووڵی دەکەن بە ناوی جێندەرەوە کوڕ وکچەکانمان ڕەگەزیان بگۆڕن؟ بیرتان چووەتەوە لە ڕێگەی بڵنگۆکانەوە لە هەڵەبجە و سلێمانی بانگەشە بۆ جێندەر و شتی دیکە دەکرا؟ قبووڵی دەکەن بۆمان نەبێ تەداخول بکەین لە پەروەردەی مناڵەکانمان؟