هۆشیار زێباری: ئاڵۆزییەکانی ناوچەکە کاریگەریان لەسەر بەڕێوەچوونی هەڵبژاردن نابێت

ئاڤا نیوز

 

پارتی داوا لە ڕێکخراوە نێودەوڵەتیەکان دەکات، چاودێری پڕۆسەی هەڵبژاردن بکەن و ئاواتەخوازن هەڵبژاردنێکی پاک و بێگەر بکرێت، جەختیش لەوە دەکاتەوە کە ئاڵۆزییەکانی ناوچەکە کار ناکاتە سەر پڕۆسەی هەڵبژاردن.

 

وێنە گەورەکە: تەنیا یەک ڕۆژ ماوە بۆ تەواوبوونی ئەو وادەیەی کۆمیسیۆنی هەڵبژاردنەکان وەک بانگەشەی خولی شەشەمی پەرلەمانی کوردستان دیاریکردووە، پارتی دیموکراتی کوردستان دوایین ئامادەسازییەکانی لەو بارەیە دەخاتەڕوو.

 

لێدوانی فەرمی: هۆشیار زێباری، ئه‌ندامی دەستەی کارگێڕی مەکتەبی سیاسیی پارتی دیموکراتی کوردستان، لە کۆنگرەیەکی ڕۆژنامەوانیدا ڕایگەیاند، "ئاڵۆزییەکانی ناوچەکە کاریگەریان لەسەر بەڕێوەچوونی هەڵبژاردن لە هەرێمی کوردستان نابێت، بۆیە سارد نەبنەوە و بەشداری لە پڕۆسەی دەنگدان بکەن".

 

لە بەشێکی دیکەی گوتەکانیدا جەختیکردەوە لەوەی داوایان لە باڵیۆز، کونسوڵخانە و ڕێکخراوە نێودەوڵەتییەکان کردووە، چاودێری هەڵبژاردن بکەن و داواکەیان قبووڵکراوە.

 

زێباری، تیشکی خستەسەر ئەوەی، کە ئەو لایەنانەی بەرامبەر پارتی زمان درێژی دەکەن، ڕۆژی 20ی 10 وەڵام وەردەگرنەوە.