بەرەی تورکمانی دژی خواستێکی ئەنجوومەنی پارێزگای کەرکووک دێتەدەنگ

ئاڤا نیوز

بەرەی تورکمانی عێراق ڕایدەگەیێنێ، دژی خواستێکی ئەنجوومەنی پارێزگای کەرکووکە بۆ دانانی کەسایەتییەکی تورکمانی بە جێگری پارێزگار لە دەرەوەی کۆدەنگی ئەو پێکهاتەیە، جەختیش دەکاتەوە حکومەتی خۆجێیی کەرکووک شەرعی نییە و ڕەنگدانەوەی ئیرادەی خەڵک نییە.

وێنە گەورەکە: دوای دوو مانگ لە پێکهێنانی حکومەتی خۆجێیی کەرکووک بەبێ بەشداری بەرەی تورکمانی، پارتی و چەند لایەنێکی عەرەبی، ئێستا لایەنە پێکهێنەرەکان دەیانەوێت ئەو پۆستانەی ماون بە دەنگدانی ئەنجوومەنی پارێزگا پڕبکرێنەوە.

ڕاگەیێنراوی فەرمی: بەرەی تورکمانی عێراق ڕوونی دەکاتەوە، خواستەکەی ئەندامانی ئەنجوومەنی پارێزگای کەرکووک جێگەی نیگەرانییە و ئەوان هیچ کەسایەتییەکی تورکمانیان بۆ پۆستی جێگری پارێزگار دیاری نەکردووە، بۆیە جەخت لەوە دەکەنەوە حکومەتی خۆجێیی کەرکووک یاسایی نییە و ڕەنگدانەوەی خواستی ڕاستەقینەی خەڵکەکەی نییە.

زانیاریی زیاتر: بەرەی تورکمانی چاوەڕوانی ئەو سکاڵایە دەکات کە لە دادگا دژی پێکهێنانی حکومەتی کەرکووک تۆماری کردووە. جەختیش دەکاتەوە لەژێر هیچ فشارێکدا دەستبەسەرداری مافی تورکمان نابن و دژی پەراوێزخستنیان دەوەستنەوە، داواش لە هەمووان دەکات پابەندی یاسا بن و دان بە خۆیاندا بگرن.