نێچیرڤان بارزانی: ڕەحم بە یەکێتی و هیچ لایەنێک ناکەین

ئاڤا نیوز

نێچیرڤان بارزانی، جێگری سەرۆکی پارتی، بۆ بەشداریکردن لە کەرنەڤاڵی بانگەشەی لیستی 190ی حیزبەکەی چووە سلێمانی و قسەی بۆ هەزاران لایەنگری پارتی کرد، پەیامی پارتیشی هەر لەوێوە گەیاندە هەموو خەڵکی سلێمانی و هەڵەبجە و ڕاپەرین و گەرمیان. مژدەشی پێدان لەدوای 20ی ئۆکتۆبەر یەکەم ئاهەنگی سەرکەوتن ئەوان دەیگێڕن.

 

چیرۆکی سەرەکی: لە کەشێکی جەماوەریی گەرموگوڕدا و نێچیرڤان بارزانی بە گەرمی دەستیپێکرد، هەر کە چووە سەر ستەیج چاکەتەکەی بەری داکەند و گوتی لەبەر گەرما خۆم لایدەبەم، نەک دواتر بڵێن چاکەتیان پێ لابرد، لەوکاتە کەسێک لەناو ئاپۆرای خەڵکەکەوە هاواری کرد ڕەحم بە یەکێتی مەکە، نێچیرڤان بارزانیش گوتی ڕەحمیان پێ ناکەین و بە کەسیشی ناکەین.

لێدوانی فەرمی: نێچیرڤان بارزانی، ڕوو لە خەڵکی سلێمانی و ناوچەکە گوتی: "خەڵکی ئەم ناوچەیە باجی ڕکابەریی نێوان لایەنە سیاسییەکان دەدەن، بەڵام پارتی کاردەکات بۆئەوەی خەڵکی ئەم ناوچەیە نەبنە قوربانیی ململانێی سیاسی و بەڵێنی بێ ناوەڕۆک".

 

قووڵتر: نێچیرڤان بارزانی جەختی کردەوە هاتوهاواری بێهوودە هیچ شتێک بۆ سلێمانی ناکات، ئەوەی بەڵێنی پێیە و دەیکاتە کردار تەنیا پارتی دیموکراتی کوردستانە و بۆ یەکجاریش بێت پارتی تاقی بکەنەوە، چونکە پارتی بۆ خۆشگوزەرانیی سنووری سلێمانی درێغی ناکات و دەنگ بدەنە پارتی و بەدەستی خۆتان ئاوەدانیی بۆ سلێمانی و هەڵەبجە بهێنن کە شایەنی خزمەت و خزمەگوزارین.

لەلایەکی دیکەوە: لە گوتارەکەیدا نێچیرڤان بارزانی، بەتایبەت پەیامێکی بۆ گەنجانی سنوورەکە نارد و پێیگوتن دوای خەڵکی پۆپۆلیست و هاشوهووشکەر نەکەون، بە قسەو جووڵەی بێ ناوەڕۆک فریونەخۆن، ئەوانەی لەناکاو دروست دەبن و خۆیان بەناڕەزایەتی خەڵکدا هەڵواسیوە، هەر زووش دەکەون، بەڵام پارتی خاوەنی مێژووە و سەلماندوویەتی حیزبی پرۆژە و کار و کردارە. ئەو لایەنانەی هەمیشە گازندە دەکەن، ئەوانەن کە هیچ بەرپرسیارێتییەکیان هەڵنەگرتووە.