زیاتر لە 110 هەزار کەس کارتی بایۆمەتری دەنگدانیان وەرنەگرتووەتەوە

ئاڤا نیوز

 

کەمتر لە حەوت کاتژمێر ماوە بۆ دەنگدەرانی هەڵبژاردنی پەرلەمانی کوردستان بۆ ئەوەی کارتی بایۆمەتری دەنگدان وەربگرنەوە، چونکە بەبێ ئەو کارتە ناتوانن دەنگ بدەن.

 

وێنە گەورەکە: ئەمڕۆ سێشەممە 15-10-2024 دوایین ڕۆژی بانگەشەی هەڵبژاردنە، هاوکات تاوەکو کاتژمێر سێی دوانیوەڕۆ ئەمڕۆ دەرفەت لەبەردەم دەنگدەران ماوە بۆ وەرگرتنەوەی کارتەکانیان، تا ئێستا زیاتر لە 110 هەزار و 385 دەنگدەر ماون کارتەکانیان وەربگرنەوە.

 

لێدوانی فەرمی: د. ئیسەر یاسین، گوتەبێژی ڕاگەیاندنی هەڵبژاردنی پەرلەمانی کوردستان بە ئاڤا نیوزی ڕاگەیاند: "دوو ملیۆن و 189 هەزار و 200 کارتی بایۆمتری دەنگدان وەرگیراونەتەوە و کاتژمێر 3ـی دوانیوەڕۆی ئەمڕۆ وەرگرتنەوەی کارتەکانی بایۆمەتری دەنگدان لە سەرجەم ئۆفیسەکان دەوەستێت، ئەو کارتانەی دەمێننەوە تاوەکو دوای پڕۆسەی هەڵبژاردن لەشوێنێکی پارێزراودا هەڵدەگیرێن".

 

ئەوەی پێویستە بیزانیت: ئەگەر ڕێژەی دەنگ بۆ هەر کورسییەک 12 هەزار کەس بێت، ئەوا 110 هەزار و 385 دەنگدەر لە دەنگدان بێ بەش دەبن کە دەکاتە نۆ کورسی پەرلەمانی.

 

ژمارەکان وادەڵێن: بەگوێرەی دوایین ئاماری کۆمیسیۆنی سەربەخۆی هەڵبژاردنەکانی عێراق، ژمارەی ئەو دەنگدەرانەی کارتی دەنگدانیان وەرنەگرتووەتەوە بەمشێوەیە:-

هەولێر: لە کۆی یەک ملیۆن و 15 هەزار و 667 دەنگدەر، لە  25 هەزار  و 846 دەنگدەر کارتەکانیان وەرنەگرتووەتەوە.

سلێمانی و هەڵەبجە: لە کۆی یەک ملیۆن و 146 هەزار و 92 دەنگدەر، 72 هەزار  و 400 کەس کارتی بایۆمەتری دەنگدانیان وەرنەگرتووەتەوە.

دهۆک: لەکۆی 737 هەزار و 856 دەنگدەر، 12 هەزار  و 139 کەس کارتی بایۆمەتری دەنگدانیان وەرنەگرتووتەوە.