سوودانی داوای هەڵبژاردنی سەرۆکی پەرلەمان دەکات

ئاڤا نیوز 

 

سەرۆکوەزیرانی عێراق دەڵێت، پشتیوانی تەواوکردنی هەموو شایستە دەستوورییەکان دەکات، لەو چوارچێوەیەشدا بە پێویستی دەزانێت هەڵبژاردنی سەرۆکی پەرلەمان  یەکلایی بکرێتەوە.

 

وێنە گەورەکە: نزیکەی ساڵێکە محەممەد حەلبووسی، بە بڕیاری دادگەی فیدراڵی لە پۆستی سەرۆکی پەرلەمان دوورخراوەتەوە، لەوکاتەوە سوننەکان بەهۆی ناکۆکییان نەیانتوانیوە کەسێک وەک جێگرەوەی هەڵبژێرن و پۆستەکە بەوەکالەت بەڕێوەدەبرێت.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق لەگەڵ سەرۆک و ئەندامانی هاوپەیمانیی عەزم کۆبووەوە و ڕایگەیاند: پشتیوانی هەموو ئەو هەوڵانە دەکەم کە بۆ هەڵبژاردنی پۆستی سەرۆکی پەرلەمان دەنرێن و داواش دەکەم ئەو شایستە دەستوورییە یەکلایی بکرێتەوە.

 

ئەوەشی خستووەتەڕوو، بۆ کێشە هەرێمی  و نێودەوڵەتییەکان و بەتایبەتیش هێرشەکانی سەر غەززە و لوبنان، حکومەت نمایندەی هەڵوێستی عێراق دەکات، هاوکات حکومەت گوزارشت لە ڕای لایەنە سیاسییەکان و مەرجەعییەت و دامەزراوە دەستورییەکانیش دەکات.