وەزیری کارەبای عێراق بانگهێشتی پەرلەمان دەکرێت

ئاڤا نیوز

 

ماوەیەکە قەیرانی نەوتی سپی و سووتەمەنیی وێستگەکانی بەرهەمهێنانی کارەبا لە عێراق سەریهەڵداوە، بۆیە لیژنەی نەوت و گازی پەرلەمانی عێراق بانگهێشتی وەزیری کارەبا و چەند بەرپرسێکی دیکەی کردووە بۆ بەدواداچوون و گفتوگۆ لەبارەی هۆکار و چارەسەری قەیرانەکە.

 

وێنە گەورەکە: گەرچی عێراق لە ڕووی نەوت و گازی یەدەگ لە پێشەنگی ڕیزبەندی وڵاتاندایە، بەڵام چەندین ساڵە بەدەست نەبوونی کارەبا و نەوتی سپی و گازی پێویست دەناڵێنێت و بەشێکی زۆری لە پێداویستییەکانی لە وڵاتانی دراوسێ دابین دەکات.

 

لێدوانی فەرمی: سەباح  سوبحی، ئەندامی لیژنەی نەوت و گاز و سامانە سروشتییەکان لە پەرلەمانی عێراق بە ئاڤا نیوزی ڕاگەیاند: پێشتر قەیرانێکی تووندی  گاز و سووتەمەنی لە پارێزگاکانی عێراق سەری هەڵدا و بۆیە بانگهێشتی وەزیری کارەبا و ژمارەیەک بەرپرسی دیکە کراوە.

 

هۆکارە زانراوەکان: بەگوتەی سەباح سوبحی، پاڵاوگەی کەربەلا مانگ و نیوێکە ڕاوەستاوە، کارگەکان بە ڕادەی پێویست کار ناکەن، سووتەمەنی لە خەزێنەی یەدەگ نەماوە ولە وەرزی هاوین تەواوی بەکارهاتووە، بەهۆی ئەوەی هاوردەکردن لە ئێران ڕاوەستاوە دیارترین هۆکارەکانی قەیرانەکەن.

 

کاریگەری و لێکەوتەکان: نەبوونی نەوتی سپی و سووتەمەنی کاریگەری لەسەر گواستنەوەی کەلوپەلە جۆراوجۆرەکان وەکو خۆراک و پێداویستیی ڕۆژانەی هاووڵاتیان لەلایەن بارهەڵگرەکانەوە هەیە و هەروەها کار دەکاتە سەر دابینکردنی کارەبای پێویست لە وەرزی زستان.