کەربەلا پێشوازیی لە نزیکەی چوار هەزار پەنابەری لوبنانی دەکات

ئاڤا نیوز

 

بەگوێرەی ئامارێکی فەرمیی عەتەبەی حوسەینی، تائێستا پارێزگای کەربەلا بەتەنیا پێشوازیی لە نیوەی ئەو پەنابەرە لوبنانییانە کردووە کە ڕوویان لە عێراق کردووە.

 

وێنە گەورەکە: بەهۆی جەنگی نێوان ئیسرائیل و حیزبوڵڵای لوبنان، زیاتر لە ملیۆنێک هاووڵاتیی لوبنان ئاوارەی وڵاتانی دراوسێ بوون، لەو ژمارەیەش نزیکەی هەشت هەزاریان گەیشتوونەتە عێراق و عەتەبەی حوسەینیش شانەیەکی قەیرانی بۆ پێشوازی کردنیان پێکهێناوە.

 

ڕاگەیێنراوی فەرمی: عەبدولئەمیر تەها عەبدوڵڵا، بەرپرسی بەشی پەیوەندییە گشتییەکانی عەتەبەی حوسەینی ڕایگەیاند: تاوەکو ئێستا نزیکەی سێ هەزار و 750 پەنابەری لوبنانی گەیشتوونەتە شاری کەربەلا، بەمەش کەربەلا پێشەنگی پارێزگاکانی عێراقە بۆ نیشتەجێکردنی پەنابەرە لوبنانییەکان.

 

زانیاریی زیاتر: عەبدوڵڵا ئاماژەی بەوەش کرد، هەر خێزانێکی پەنابەری لوبنانی بگاتە کەربەلا ڕاستەخۆ عەتەبەی حوسەینی شوێنی حەوانەوە و نیشتەجێبونییان لە شارەکانی زیارەتکاران و ئوتێل و حوسەێنییە و کۆمەڵگەی نیشتەجێبون بۆ دابین دەکات.