كاركردن لە زۆنی چوارەمی هەشتی حەسارۆكی هەولێر دەستپێدەكات

ئاڤا نیوز

بە فەرمانی سەرۆكوەزیران مەسرور بارزانی، پڕۆژە خزمەتگوزارییەكانی حكومەت بۆ گەڕەكی هەشتی حەسارۆكی هەولێر بەردەوامن و ئەمڕۆ كاركردن لە زۆنی چوارەمی کەرتەکە دەستپێدەكات.

وێنە گەورەکە: زیاتر لە 15 ساڵە نزیکەی 16 هەزار پارچەزەوی لە گەڕەکی هەشتی حەسارۆک دابەشکراون، سەرەڕای ئەوەی پێشتر خزمەتگوزارییان بۆ دابین نەکرابوو، بەڵام لەم کابینەیەدا توانرا هەندێک خزمەتگوزاری بۆ گەڕەکەکە دابین بکرێت و ئێستاش خزمەتگوزارییەكان بەردەوامن. 

لێدوانی فەرمی: هەشتی حەسارۆك لە چوار زۆن پێكدێت، ساسان عەونی، وەزیری شارەوانی و گەشتوگوزار بە ئاڤا نیوزی ڕاگەیاند: "پێشتر لە سێ زۆن دەست بە پڕۆژە خزمەتگوزارییەكان کرابوو، ئەمڕۆش لە زۆنی (A) دەستپێدەكات و ئیدی هیچ زۆنێكی نامێنێت دەستی خزمەتگوزاری پێ نەگەیشتبێت".

زانیاریی زیاتر: ئەو پڕۆژەیەی ئەمڕۆ لە زۆنی (A)ی دەستپێدەكات بریتییە لە: كردنەوەی شەقامە بیست مەتری و سی مەترییەكان و تێكەڵەڕێژكردنیان بە درێژایی 11 كیلۆمەتر، بە گوژمەی نزیكەی 600 ملیۆن دینار لەسەر بودجەی سەرۆكایەتیی شارەوانیی هەولێر جێبەجێ دەكرێت.

لەلایەكی دیكەوە: بەگوتەی وەزیری شارەوانی، تاوەكو كەمتر لە ساڵێكی دیكە هێڵێكی پڕۆژەی ئاوی فریاگوزاریی هەولێر دەگاتە زۆنی (A)ی هەشتی حەسارۆك و لەو ڕێگەیەوە ئاو بۆ گەڕەكەكە دابین دەكرێت.

باکگراوند: زەوییەکانی هەشتی حەسارۆک دەکەونە بەشی ڕۆژهەڵاتی شاری هەولێر لە ڕێگەی کۆیە، دابەشی سەر چوار کەرتی (A, B, C, D) دەبن، ڕووبەری بەشی زۆری زەوییەکان 250 مەترە.