سەرۆكوەزیران بارزانی: ڕێگا و شەقامی پێشکەوتوو لە هەموو کوردستان دروست دەکەین

ئاڤا نیوز 

لەکاتی دانانی بەردی بناغەی  جووتسایدی بەردەڕەش – كەڵەك، سەرۆكوەزیران مەسرور بارزانی ڕایگەیاند ڕێگا و شەقامی پێشکەوتوو لە هەموو کوردستان دروست دەکەن.

 

چیرۆکی سەرەکی: ئەمڕۆ پێنجشەممە  سەرۆكوەزیران مەسرور بارزانی بە گوژمەی 98 ملیار دینار بەردی بناغەی  جووتسایدی بەردەڕەش – كەڵەكی دانا، کە ڕێگایەکی گرنگی بازرگانی نێوان هەرێمی کوردستان و تورکیایە و بە ماوەی سێ ساڵ تەواو دەکرێت.

 

لێدوانی فەرمی: سەرۆكوەزیران مەسرور بارزانی ڕایگەیاند: "ئەم ڕێگایە زۆر سوودی بۆ هەموو خەڵكی كوردستان دەبێت، لە كابینەی نۆیەمی حكومەت گرنگییەكی زۆر بە پڕۆژە خزمەتگوزارییەكان دراوە و هەوڵ دراوە ڕێگا و شەقامی پێشكەوتوو لە هەموو دەڤەرێك دروست بكرێت، لەسەر ئەم بەرنامەیەش بەردەوام دەبین".

سەرۆكوەزیران مەسرور بارزانی ڕاشیگەیاند: ئەم دوو سایدە نەك تەنیا كەڵەك و بەردەڕەش بەیەكەوە گرێدەدەات، بەڵكو ڕێگایەكی گرنگی ئابوورییە و پارێزگاكانی هەولێر و دهۆك و نەینەواش بەیەكەوە گرێ دەدات، هاوكات سوودیشی بۆ ئەو بارهەڵگرانە دەبێت كە لە توركیاوە دێنە نێو خاكی هەرێمی كوردستان. ئامۆژگاری شۆفێرانیشی کرد دروستکردنی ڕێگای نوێ و باش مانای ئەوە نادات بەخێراییەکی زۆر شۆفێری بکەن، بەڵكو لەپێناو سەلامەتی خۆیان و سەرنشینان پێویستە بە ڕێنماییەکانی هاتووچۆ پابەند بن.

لەلایەكی دیكەوە: سەرۆكوەزیران مەسرور بارزانی ئاماژەی بە ئەوەش دا كە دەڤەری بەردەڕەش شایەنی خزمەتگوزاری زیاترە و لە داهاتووشدا حكومەت خزمەتگوزاریی زیاتر پێشكەشی دەڤەرەكە دەكات، ئەوەشی خستەڕوو كە بەرهەمی کشتوکاڵی دەڤەرەكە گەیشتووەتە دەرەوەی وڵات.