نێچیرڤان بارزانی: وەرگرتنی بڕوانامەی زانکۆی دهۆک جێگای شانازییە

ئاڤا نیوز

 

لە ڕێوڕەسمی دەرچووانی زانکۆی دهۆک، سەرۆکی هەرێمی کوردستان پیرۆزبای لە مامۆستایان و دەرچووان و کەسوکاریان کرد، هاوکات گوتیشی "لەم بارودۆخەدا وڵات پێویستی بە کەسی زیرەک و لێهاتوو و ڕەخنەگری بونیاتنەر بۆ چارەسەری کێشە و تەحەدییەکان کە دێنە پێش خەڵک و وڵاتەکەمان".

 

وێنە گەورەکە: ئەمڕۆ پینجشەممە، بە ئامادەبوونی نێچیرڤان بارزانی سەرۆکی هەرێمی کوردستان، ڕێوڕەسمی خولی 29مین دەرچووانی قوتابیانی زانکۆی دهۆک بەڕێوەچوو.

 

لێدوانی فەرمی: نێچیرڤان بارزانی، سەرۆکی هەرێمی کوردستان ڕایگەیاند: پیرۆزبایی لە دەرچووانی زانکۆ و ماڵباتیان و مامۆستاکانیان دەکەین و سەرکەوتنیان بۆ دەخوازم، ئەم ئێوارەیە دەستپێکی قۆناغێکە بۆ کاروانی ژیانتان.

 

سەرۆکی هەرێمی کوردستان گوتیشی: وەرگرتنی بڕوانامەی زانکۆی دهۆک جێگای شانازییە و بەرپرسیارێتییەکی گەورە دەکەوێتە ئەستۆتان بۆ خزمەتکردنی پاشەڕۆژی خەڵک و وڵات، دەرچووانی زانکۆ دەتوانن بە ڕەخنەگرتنی بونیاتنەرانە و زیرەکی خۆیان هەنگاو بۆ چارەسەرکردنی کێشە و گرفتە جیاوازەکان بدۆزنەوە.

زانیاریی زیاتر: نێچیرڤان بارزانی دەڵێت: "لە عێراق و هەرێمی کوردستان لە چەندین بواری جیاوازی وەک کۆمەڵایەتیی و ئابووری تەحەدی زۆر هەیە، پێویستە دەرچوانی زانکۆ ڕۆڵی گرنگ بۆ چارەسەرکردنیان بەڕێگەی داهێنان و کار و بزنس و بەشداریکردن لە خستنە ڕووی بەرنامە و ستراتیژی بەشداربن.

ئەوەی پێویستە بیزانیت: زانکۆی دهۆک یەکێکە لە زانکۆ گەورەکانی هەرێمی کوردستان و لە ساڵی 1992 دامەزراوە، لە سەرەتای دامەزراندنی تەنیا دوو کۆلێژی هەبووە، بەڵام ئێستا خاوەنی 17 کۆلێژە.