فڕۆکە جەنگییەکانی عێراق مەفرەزەیەکی داعش لە ناحیەی شوان دەکاتە ئامانج

ئاڤا نیوز

 

ئەمشەو بە فڕۆکە جەنگییەکانی عێراق مەفرەزەیەکی داعش لە ناحیەی شوان بۆردوومان کرا، بەو هۆیەشەوە چوار چەکداری داعش کوژران.

 

لێدوانی فەرمی: سەرچاوەیەکی باڵای هێزی پێشمەرگە لە سنووری میحوەری چوار، بە ئاڤا نیوزی ڕاگەیاند: ڕۆژی 16-10-2024، مەفرەزەیەکی پێنج کەسی داعش چوونەتە گوندی تەپەکوڕ لە ناحیەی شوان و لەوێ ماونەتەوە.

 

سەرچاوەکەی هێز پێشمەرگە گوتیشی: گوندی تەپەکوڕ تەنیا یەک ماڵی تێدایە و خاوەن ماڵەکە ژن و پیاوێک بوون کە ئاژەڵداربوون و کێڵگەی پەلەوەریشیان هەبووە، بە بینینی چەکدارەکانی داعش لە ترسان هەڵهاتوون و خۆیان دەربازکردووە. 

 

زانیاریی زیاتر: دوای چاودێریکردنی گوندەکە بۆ ماوەی 24 کاتژمێر، ئەمشەو کاتژمێر 9:30ی شەو دوو فڕۆکەی جەنگی عێراق بۆردوومانی گوندەکەیان کردووە و مەفرەزەکەی داعشیان کردووەتە ئامانج، بەو هۆیەشەوە چوار چەکداری داعش کوژراون و چەکدارێکیان ماوە، بەڵام ئاگر لە ناوچەکە کەوتووەتەوە.

 

ئەوەی پێویستە بیزانیت: گوندی تەپەکوڕ دەکەوێتە ڕۆژهەڵاتی ناحیەی شوان لە زنجیرە چیای خاڵخاڵان، لە سنووری پارێزگای کەرکووک.