ئاگادارییەک لە کۆمیسیۆنەوە بۆ لایەنەکان: هەر تێبینییەکتان هەیە سکاڵا تۆمار بکەن

ئاڤا نیوز

کۆمیسیۆنی هەڵبژاردنەکانی عێراق ڕایدەگەیێنێ، تاوەکو ئێستا پرۆسەی دەنگدانی تایبەت بۆ هەڵبژاردنی پەرلەمانی کوردستان بەشێوەیەکی ئاسایی بەردەوامە، ئەو لایەنانەی ناڕەزاییان لەسەر پرۆسەکە هەیە، دەتوانن سکاڵا تۆماربکەن.

وێنە گەورەکە: لە کاتژمێر 7:00ی بەیانی ئەمڕۆوە پرۆسەی دەنگدانی تایبەت بۆ هەڵبژاردنی پەرلەمانی کوردستان دەستیپێکردووە و کاتژمێر 06:00ی ئێوارە تەواو دەبێت، چاوەڕێ دەکرێت ڕێژەی بەشداریکردن 95% تێپەڕێنێت.

لێدوانی فەرمی: ئەیسەر یاسین، گوتەبێژی ڕاگەیاندنی هەڵبژاردنی پەرلەمانی کوردستان لە کۆمیسیۆنی هەڵبژاردنەکانی عێراق بە ئاڤا نیوزی ڕاگەیاند، پرۆسەی دەنگدانی تایبەت بەشێوەیەکی ئاسایی بەردەوامە.

لەلایەکی دیکەوە: لەبارەی بردنەژوورەوەی مۆبایل لەلایەن دەنگدەران گوتەبێژی کۆمیسیۆن  دەڵێت: بەگوێرەی ڕێنماییەکانی کۆمیسیۆن دەنگدەر دەتوانێت مۆبایل لەگەڵ خۆی بباتە وێستگەی دەنگدان، بەڵام نابێت بەکاریبهێنێت.

گۆشەیەکی دیکە: کۆمیسیۆن لایەنەکان ئاگادار دەکاتەوە دوای کۆتاییهاتنی پرۆسەی دەنگدانی تایبەت، دەرگا بەڕوویاندا دەکرێتەوە ئەگەر تێبینییان لەسەر پرۆسەکە لە هەر وێستگە و بنکەیەکی دەنگداندا هەبێت، دەتوانن سکاڵا تۆمار بکەن.