پارتی ئەنجامی دەنگدانی تایبەتی ئاشکرا کرد

ئاڤا نیوز

 

لیژنەی باڵای هەڵبژاردنی پارتی ئەنجامی دەنگدانی تایبەتی ئاشکرا کرد و ڕایگەیاند،  86 هەزار و 775 دەنگیان هێناوە و 36 هەزار دەنگ لەپێش یەکێتییەوەن.

وێنە گەورەکە: لە هەڵبژاردنی تایبەت 215 هه‌زار و 960 ده‌نگده‌ر مافی ده‌نگدانیان هه‌بوو، بەکۆی گشتی لە هەرچوار بازنەی هەڵبژاردن (هەولێر، سلێمانی، دهۆک و هەڵەبجە)ڕێژەی بەشداریکردن 97% بوو، سەرجەمیان له‌ 165 بنكه‌ی ده‌نگدان و 749 وێستگه‌ ده‌نگیان دا.

لێدوانی فەرمی: هێمن هەورامی، سەرپەرشتیاری لیژنەی باڵای هەڵبژاردنی پارتی لەبارەی ئەنجامی دەنگدانی تایبەت لە کۆنگرەیەکی ڕۆژنامەوانیدا ڕایگەیاند، لە هەر 165 بنکەی دەنگدان بریکاریان هەبووە و لەرێگەی سیستمێکی دیجیتاڵییەوە دوای تەواوبوونی دەنگدان ئەنجامەکەیان دەستکەوتووە، بەپێی ئەو ئەنجامەی کۆمیسیۆن بە بریکارەکانی لایەنە سیاسییەکانی داوە، ئەنجامەکە بەمشێوەیە:

- دەنگی دروست: 179 هەزار و 326 دەنگ

- دەنگی پووچەڵ: 21 هەزار و 131 دەنگ

- پارتی: 86 هەزار و 775 دەنگی بەدەستهێناوە.

- یەکێتی: 50 هەزار و 776 دەنگی هێناوە.

- نەوەی نوێ: 11 هەزار و 78 دەنگ

-یەکگرتوو: سێ هەزار و 18 دەنگ

- بەرەی گەل: دوو هەزار و 51 دەنگ

-کۆمەڵ: دوو هەزار و 365 دەنگ

- ڕەوتی هەڵوێست: دوو هەزار و 448 دەنگ

- بزووتنەوەی گۆڕان: 585 دەنگ

ئەوەی پێویستە بیزانیت: کۆنگرەی ڕۆژنامەوانیی پارتی لە وەڵامی کۆنگرەیەکی ڕۆژنامەوانی یەکێتی بوو. ئەمڕۆ یەکشەممە کاروان گەزنەیی، گوتەبێژی لیستی یەکێتی ئەنجامی دەنگدانی تایبەتی بڵاوکردەوە، بەپێی داتاکەی ئەوان پارتی:  74 هەزار و 513 دەنگ، یەکێتی: 70 هەزار و 10 دەنگ، نەوەی نوێ:  5 هەزار و 329 دەنگ،  یەکگرتوو: سێ هەزار و 5 دەنگ، هەڵوێست: دوو هەزار و 516 دەنگ، کۆمەڵ: دوو هەزار و نۆ دەنگ، بەرەی گەل: هەزار و 598 دەنگ، گۆران: 706 دەنگیان هێناوە.