نەتەوەیەکگرتووەکان لەبارەی ساختەکاری لە هەڵبژاردن دڵنیایی دەدات

ئاڤا نیوز

 

نوێنەری تایبەتی سکرتێری گشتیی نەتەوەیەکگرتووەکان لە عێراق، لەبارەی  بەرێوەچوونی هەڵبژاردنی پەرلەمانی کوردستان پەیامێکی بڵاوکردەوە و ڕایگەیاند: دیموکراسی لەم ناوچەیەدا ڕۆژ بە ڕۆژ گەشە دەکات.

 

وێنە گەورەکە: كاتژمێر 07:00ی ئەمڕۆ یەكشەممە پرۆسەی دەنگدانی گشتیی بۆ هەڵبژاردنی خولی شەشەمی پەرلەمانی کوردستان دەستیپێکرد. دوو ملیۆن و 686 هەزار و 578 کەس مافی دەنگدانیان هەیە و بەسەر هەرچوار بازنەی هەولێر، دهۆک، سلێمانی و هەڵەبجە دابەش بوون. پرۆسەکە تا کاتژمێر شەشی ئێوارە بەردەوام دەبێت.

 

ڕاگەیێنراوی فەرمی: محەممەد ئەلحەسان، نوێنەری تایبەتی سکرتێری گشتیی نەتەوەیەکگرتووەکان لە عێراق ڕایگەیاند: "خەڵک حەز دەکەن بەشێوەیەکی شارستانی و ڕێکخراو ئەو مافەی خۆیان پیادە بکەن، ئەوەش مانای وایە ئەو پرۆسەیە لای هەمووان کۆدەنگی لەسەرە و پرۆسەی دیموکراسی لەم ناوچەیەدا ڕۆژ بە ڕۆژ زیاتر گەشە دەکات، نەتەوەیەکگرتووەکان پشتیوانی ئەم ئاڕاستەیە دەکات و کۆمەڵگەی نێودەوڵەتیش چاودێری پرۆسەی هەڵبژاردن لەم بەشە خۆشەویستەی عێراق دەکات".

 

لەلایەکی دیکەوە:  محەممەد ئەلحەسان ئومێدەوارە هەرێمی کوردستان سەرکەوتوو و هەر لە ئارامیدا بێت، دڵنیاییش دەدات لەوەی هەر حاڵەتێکی نەخوازراو لەم پڕۆسەیەدا هەبێت لەلایەن کۆمیسیۆنی هەڵبژاردنەکانەوە  تۆمار دەکرێت و کاری لەسەر دەکرێت.