چوارچێوەی هەماهەنگی داوای دانیشتنێک بۆ هەڵبژاردنی سەرۆکی پەرلەمان دەکات

ئاڤا نیوز

 

چوارچێوەی هەماهەنگی داوا دەکات ڕۆژی شەممەی داهاتوو دانیشتنی ئەنجوومەنی نوێنەران بۆ یەکلاییکردنەوەی پۆستی سەرۆکی پەرلەمان گرێ بدرێت.

 

چیرۆکی سەرەکییەکە: درەنگانی شەوی دووشەممە 21-10-2024 سەرکردەکانی نێو چوارچێوەی هەماهەنگی بە ئامادەبوونی سەرۆکوەزیرانی عێراق لە نووسینگەی عەممار حەکیم، سەرۆکی ڕەوتی حیکمەی نیشتمانی کۆبوونەوەی خولی خۆیان گرێدا و لە کۆبوونەوەکە چەند پرسێک تاوتوێ کران.

 

ڕاگەیێنراوی فەرمی: جگە لە گۆڕینەوەی بیرو ڕا لە بارەی دۆخی سیاسی عێراق و پێشهاتەکانی ناوچەکە، بەرز نرخاندنی ڕێکارەکانی حکومەت بۆ ئەنجامدانی سەرژمێری دانیشتوان، داوای لە ئەندامانی ئەنجوومەنی نوێنەران کرد ڕۆژی شەممەی داهاتوو کۆبوونەوەیەک بۆ چارەسەرکردنی پرسی سەرۆکایەتی ئەنجوومەنی نوێنەران و کۆتاییهێنان بە چۆڵبوونی ئەو پۆستە گرنگە بەدرێژایی ماوەی ڕابردوو بکەن.

 

وێنە گەورەکە: زیاتر لە 11 مانگە پەرلەمانی عێراق بێ سەرۆکە، بەهۆی دوورخستنەوەی محەممەد حەلبووسی لە پۆستەکە لە لایەن دادگەی فیدراڵی بەتۆمەتی گەندەڵیکردن، لایەنە سیاسییەکان و بە تایبەتی هێزە سوننەکان بە درێژایی ئەو ماوەیە ناکۆکن لەسەر جێگرەوەی حەلبووسی.

 

ئەوەی پێویستە بیزانیت: هەریەک لە مەحموود مەشهەدانی و سالم عیساوی کێبڕکێ لەسەر بەدەستهێنانی پۆستەکە دەکەن و هیچ بەربژێرێكی دیکە نایێتە نێو کێبڕکێکەوە.