مالیکی پەیامێک ئاراستەی خەڵک و حیزبەکانی کوردستان دەکات

ئاڤا نیوز

حیزبی دەعوە پیرۆزبایی سەرکەوتنی هەڵبژاردن لە گەلی کوردستان و لایەنە براوەکانی هەڵبژاردن دەکات، داواش دەکات حکومەتی نوێی هەرێمی کوردستان ئاسۆی نوێ لەگەڵ بەغدا بۆ چارەسەری کێشە هەڵپەسێردراوەکان بکاتەوە.

ڕاگەیێنراوی فەرمی: مەکتەبی سیاسی حیزبی دەعوەی ئیسلامی کە نووری مالیکی، سەرۆکوەزیرانی پێشووتری عێراق سەرۆکایەتی دەکات، لە پەیامێکدا دەڵێت: "پیرۆزبایی لە گەلی کورد دەکەین بەبۆنەی سەرکەوتنی هەڵبژاردنی پەرلەمانی کوردستان، کە لە کەشێکی سیاسی، ئەمنی و هونەری لەباردا کرا و بەهۆیەوە گەلی کورد توانی نوێنەرانی خۆی بە ئازادییەکی تەواوەوە بۆ بەڕێوەبردنی دامەزراوەکانی بەڕێوەبردن لە هەرێم هەڵبژێرێت".

بابەتی ستراتیژی: وێڕای پیرۆزبایی لەو حیزب و کاندیدانەی دەنگی پێویستیان بۆ گەیشتن بە پەرلەمان بەدەستهێناوە، حیزبی دەعوە ئومێدەوارە بەخێرایی حکومەتێکی هاوبەشی بە بەرنامە پێکبهێنرێت، بەجۆرێک لەئاست خواستی شەقامی کوردیدا بێت لە هەموو ئاستەکان، هیواخوازیشە "حکومەت {کابینەی نوێی حکومەتی هەرێمی کوردستان} ئاسۆی نوێ لە پەیوەندی لەگەڵ بەغدا بکاتەوە و کێشە هەڵپەسێردراوەکان بە پشتبەستن بە دەستوور چارەسەر بکرێن و یەکڕیزی نیشتیمانیی عێراق بەهێزتر بکات".

لەلایەکی دیکەوە: حیزبی دەعوە ستایشی کۆمیسیۆنی هەڵبژاردنەکانی عێراق دەکات بەهۆی ئەوەی لە بەڕێوەبردنی هەڵبژاردنی پەرلەمانی کوردستان و تەواوکردنی ئەو شایستە دیموکراسییەدا، سەرکەوتنی بەدەستهێناوە.