سوودانی شوێنگرەوەی سەرۆکی دەستەی دەستپاکی دەستنیشان دەکات

ئاڤا نیوز

 

سەرۆکوەزیرانی عێراق دوای ماوەیەک لە دوورخستنەوەی سەرۆکی دەستەی دەستپاکیی عێراق و دامەزرادنی وەکو ڕاوێژکاری تایبەت لە وەزارەتی داد، سەرۆکێکی نوێی بۆ دەستەکە دیاری کرد.

 

وێنە گەورەکە: حەیدەر حەنوون چەندین دۆسیەی گەندەڵی لە دادگا لەسەر ساغ کراوەتەوە و لە ڕۆژی دادگاییکردنی کە 22-10-2024 بەڕێوەچوو، سەرۆکوەزیران لە پۆستەکەی دووری خستەوە و دوای دەنگدان لە ئەنجوومەنی وەزیران، سەرۆکوەزیران بە پلەی ڕاوێژکاری تایبەت لە وەزارەتی داد دایمەزراند.

 

ڕاگەیێنراوی فەرمی: نووسینگەی میدیایی سەرۆکوەزیرانی عێراق ڕایگەیاند: محەممەد شیاع سوودانی، سەرۆکوەزیرانی عێراق محەممەد عەلی لامی وەکو سەرۆکی دەستەی دەستپاکی دامەزراند و دووپاتی کردەوە حکومەت بەردەوام دەبێت لە بەرەنگاربوونەوەی گەندەڵی.

 

لە لایەکی دیکەوە: ئاڤا نیوز لە سەرچاوەیەکی حکومی زانیویەتی، دوورخستنەوەی حەیدەر حەنوون و بوونی بە ڕاوێژکاری پلە تایبەت بە ڕێکەوتن و نێوەندگیری چەند لایەنێکی سیاسی کراوە بە مەرجێک لێکۆڵینەوە لە تۆمارە دەنگییەکەی حەنوون کۆتایی پێ بێت و هەموو ئەو تۆمەتانەی دژی هەڵبووەشێنێنەوە.

 

زانیاریی زیاتر: محەممەد لامی لە ساڵی 1975 لە دایکبووە و بڕوانامەی دکتۆرای لە یاسا بەدەستهێناوە و کۆنترین بەڕێوەبەری گشتییە لە دەستەی دەستپاکی کە بەڕێوەبەری چەندین بەڕێوەبەرایەتی بووە لە دەستەکەدا، دوایین جار بەڕێوەبەری گشتیی بەڕێوەبەرایەتیی خۆپارێزی بووە.