تورکیا 32 پێگە لە هەرێمی کوردستان و ڕۆژئاوای کوردستان  بۆردوومان دەکات

ئاڤا نیوز

لەدوای تەقینەوە و هێرشەکەی دوێنی ئەنقەرە، سوپای تورکیا شەوی ڕابردوو 32 ئامانجی پەکەکە و یەپەگەی لە هەرێمی کوردستان و ڕۆژئاوای کوردستان بۆردوومان کرد و ژمارەیەک کوژراو و برینداری لێکەوتەوە.

ڕاگەیێنراوی فەرمی: وەزارەتی بەرگریی تورکیا ڕایگەیاند:، بەپێی ماددەی 51ی نەتەوەیەکگرتووەکان، 32 پێگەیان لە ناوچە سنوورییەکانی هەرێمی کوردستان و ڕۆژئاوای کوردستان بۆردوومان کردووە و "ژمارەیەکی زۆر لە چەکدارانی پەکەکە کوژراون".

لەلایەکی دیکەوە: میدیاکانی نزیک لە پەکەکە و یەپەگە ڕایانگەیاندووە، فڕۆکەکانی تورکیا شاری قامیشلۆیان لە ڕۆژئاوای کوردستان بۆردوومان کردووە، بەهۆیەوە سێ کەس کوژراون و دەیان کەس بریندار بوون. لە شەنگالیش بەهۆی بۆردوومانەکان یەک کەس بریندار بووە.

باکگراوند: ئێوارەی دوێنێ چوارشەممە بە تەقینەوە و دەستڕێژیی گوللە هێرش کرایە سەر کۆمپانیای پیشەسازیی فڕۆکەوانی تورکیا لە ئەنقەرە، بەهۆیەوە چوار کەس کوژران و 14 کەسی دیکە بریندار بوون، تورکیاش پەکەکە بە هێرشەکە تۆمەتبار دەکات.