سوودانی: مۆڵەت بە یەک ملیۆن یەکەی نیشتەجێبوون دەدەین

ئاڤا نیوز

سەرۆک وەزیرانی عێراق دەڵێت، تا کۆتایی تەمەنی حکومەتەکەی ڕێکارەکانی مۆڵەتپێدان بە ملیۆنێک یەکەی نیشتەجێبوون تەواو دەکات.

وێنە گەورەکە: بەگوێرەی ئامارەکانی وەزارەتی ئاوەدانکردنەوە و نیشتەجێکردن، بۆ چارەسەری کێشەی نیشتەجێبوون عێراق پێویستی بە سێ تا پێنج ملیۆن یەکەی نیشتەجێبوون هەیە، وەزارەتەکە لە هەوڵدایە تاوەکو ساڵی 2030 بەلایەنی کەمەوە سێ ملیۆن یەکەی نیشتەجێبوونی نوێ دروست بکات.

لێدوانی فەرمی: محەممەد شیاع سوودانی، سەرۆکوەزیرانی عێراق لە پارێزگای واست بەردی بناغەی دوو پڕۆژەی نیشتەجێبوونی دانا کە پێکەوە 45 هەزار یەکە لەخۆدەگرن، لە لێدوانێکیشدا وتی، پڕۆژە تازەکانی نیشتەجێبوون لەناوخۆیاندا شارێکی تەواون و هەموو ناوەندە ئابوری، خزمەتگوزاری و بازرگانییەکانیان تێدا دەبێت و بەهاوکاری کەرتی تایبەت دروست دەکرێن.

زانیاریی زیاتر: بەوتەی سەرۆک وەزیران، حکومەت هەموو ئاسانکارییەک دەکات و زەوی بۆ پڕۆژەکان تەرخان دەکات، ئەویش بە ئامانجی ئەوەی نرخی یەکەکان نزم بن و هەموو چین و توێژەکان بتوانن ببن بە خاوەن یەکەی خۆیان.