عێراق: بە تووندی سەرکۆنەی هێرشی ئیسرائیل بۆ سەر ئێران دەکەین

ئاڤا نیوز 

 

حکومەتی عێراق سەرۆکۆنەی هێرشی ئیسرائیل بۆسەر ئێران دەکات و هاودەنگی و هاوسۆزیی خۆی لەگەڵ کۆماری ئیسلامی ئێران دووپات دەکاتەوەو جەخت لە هەڵوێستی خۆی لەبارەی ڕاگرتنی شەڕ لە غەززە و لوبنان دەکاتەوە.

 

وێنە گەورەکە: بەرەبەیانی ڕۆژی شەممە 26-10-2024، سوپای ئیسرائیل هێرشی مووشەکی و ئاسمانیی کردە سەر چەند شوێنێکی ئێران و چەند ئامانجێکی سەربازیی لەو وڵاتە کردە ئامانج. هێرشەکانیش کاردانەوەی وڵاتان و لایەنەکانی بەدوای خۆیدا هێنا.

 

ڕاگەیێنراوی فەرمی: باسم عەوادی، گوتەبێژی حکومەتی عێراق ڕایگەیاند: قەوارەی زایۆنیستی بەردەوامە لە سیاسەتە شەڕانگێزەکانی و فراوانکردنی ململانێکان لە ناوچەکەدا، ئەمجارەش دەستدرێژی کردە سەر کۆماری ئیسلامی ئێران.

 

ئەوەی لەوبارەیەوە دەگوترێت: بەگوێرەی ڕاگەیێنراوەکە "عێراق پێشتر هۆشداریی دابوو سەبارەت بە لێکەوتە مەترسیدارەکانی دەرئەنجامی بێدەنگی کۆمەڵگەی نێودەوڵەتیی سەبارەت بە هەڵسوکەوتی دڕندانەی زایۆنیستی بەرامبەر گەلەکەمان لە فەلەستین، هێرشەکانی بۆ سەر لوبنان و سووریا و هاوکات دەستدرێژی نوێی بۆ سەر ئێران".

 

کاریگەریی و لێکەوتەکان: "عێراق بە تووندترین شێوە سەرکۆنەی ئەم دەستدرێژییە دەکات، هاودەنگی و وەستانی خۆی لەگەڵ کۆماری ئیسلامی ئێران دووپات دەکاتەوە، هاوکات جەخت لە هەڵوێستی جێگیری خۆی دەکاتەوە لە وەستانی شەڕ لە غەززە و لوبنان و هەنگاوی هەمەلایەنەی ناوچەیی و نێودەوڵەتیی بۆ پشتگیری سەقامگیری لە ناوچەکەدا".