موقتەدا سەدر: هێرشەکە ئەوەندە لاواز بوو هی ئەوە نییە سەرکۆنە بکرێت

ئاڤا نیوز

 

ڕێبەری ڕەوتی نیشتمانی شیعە، هێرشی ئیسرائیل بۆسەر ئێران بە لاواز دەبینێت و پێیوایە هی ئەوە نییە سەرکۆنە بکرێت.

 

وێنە گەورەکە: کاردانەوەی وڵاتانی عەرەبی و ئیسلامی لە بەرامبەر هێرشی مووشەکی و ئاسمانیی ئیسرائیل بۆسەر چەند ئامانجێکی سەربازیی لە خاکی ئێران بەردەوامە، هەڵوێستی ئەمجارەی موقتەدا سەدر لەبارەی هێرشەکەوە جیاواز بوو.

 

ڕاگەیێنراوی فەرمی: موقتەدا سەدر، ڕێبەری ڕەوتی نیشتمانی شیعە ڕایگەیاند: بۆردوومانی ئیسرائیل بۆسەر خاکی ئێران وەک وڵاتێکی سەربەخۆ و خاوەن سەروەریی، پێشێلکاریی ڕوونی یاسا نێودەوڵەتییەکانە بە هاوکاریی ئەمریکا.

 

کاریگەریی و لێکەوتەکان: موقتەدا سەدر دەڵێت: سوپاس بۆ خودا وەڵامدانەوەکە لاواز بوو، ئەمە ڕادەی ئەو سەرلێشێواوی و دڵەڕاوکێیە لە ڕادەبەدەرەی ئیسرائیل و لایەنگرانی پیشان دەدات بە هۆی بەردەوامیی هەڵوێستی ئێران لە بەرخودان، هەر بۆیە زۆر لەوە کەمترە بێین و سەرکۆنەی بکەین.

 

لەلایەکی دیکەوە: سەدر داوا لە وڵاتانی عەرەبی و ئیسلامی دەکات گوشار بخەنە سەر ئەو هێزە "خۆبەزلزانە" بۆ ڕاگرتنی کۆمەڵکوژی و تیرۆر و کوشتنی منداڵان و خەڵکی مەدەنی و پێشێلکارییەکانی.