گۆڕانی کەشوهەوا مەترسی لەسەر هەنگوین دروست کردووە

ئاڤا نیوز

بەهۆی گۆڕانی ئاووهەوا و گەرمبوونی زەوییەوە تا دێت ژمارە و جۆری گوڵەکان لە ڕۆژئاوای ئوسترالیا کەمتر دەبێتەوە، ئەمەش کاریگەریی نەرێنی لە سەر بڕ و کواڵیتیی بەرهەمی هەنگوینی ئەم ناوچەیە داناوە.

چیرۆکی سەرەکی: یەکێک لە باشترین جۆرەکانی هەنگوین لە ڕۆژئاوای ئوسترالیا بەرهەم دەهێنرێت، ئەمەش لەبەر سەدان جۆری گوڵی سروشتییە لە ناوچەکەدا دەڕوێن، بەڵام گۆڕانی کەشوهەوا مەترسی لەسەر دروست کردووە.

لێدوانی فەرمی: هەنگەوانان نیگەرانن لەوەی وشکەساڵی و کەمبوونەوەی گوڵ بووەتە هۆی ئەوەی هەنگەکان بە ئاسانی خۆراکیان دەست نەکەوێت. ئانتۆن ئیستەر هویسنی هەنگەوان دەڵێت: "بەدڵنیاییەوە گوڵەکان کەمتر بوونەتەوە. لە ڕۆژئاوای ئوسترالیش باران کەمە و هاوین زۆر گەرمە، ئەمەی کە ئێمە دەیبینین لەوانەیە لێکەوتەکان بێت."

لەلایەکی دیکەوە: بەهۆی وشکەساڵییەوە ئەو گوڵانەی دەپشکوێن شیلە و گەردیان کەمە؛ ئەمەش واتە نابنە سەرچاوەیەکی باش بۆ خۆراکی هەنگەکان.  لیز باربەر، توێژەر "دەتوانیت تا ڕادەیەک جۆری ڕووەکەکە لەکاتی گوڵکردنەکەیدا دیاری بکەیت. ئەوە ڕوون و ئاشکرا بووە بە هۆی ئەو گوڵکردنەی کە ڕوویداوە. بەڵام ئەوە گوڵکردنێکی وشک بووە. لە ڕاستیدا لە زۆربەی ئەو گوڵانەدا هیچ شیلە یان گەردی گوڵیان تیا نەبووە."

ئەوەی پێشبینی دەکرێت: زانایان پێشبینیی دەکەن لە ساڵانی داهاتوودا کاریگەرییەکانی گۆڕانی ئاووهەوا و گەرمبوونی زەوی زیاتر ببێت و زیانەکانیش زۆرتر ببن.