فراکسیۆنەکان گەیشتوونەتە ڕێککەوتنێکی سەرەتایی بۆ تێپەڕاندنی پرۆژەیاساکان

ئاڤا نیوز

فراکسیۆنەکان گەیشتوونەتە ڕێککەوتنێکی سەرەتایی بۆ تێپەڕاندنی ئەو پرۆژەیاسایەی کە لە ڕێگەیەوە زەوی داگیرکراو بۆ خاوەنە ڕەسەنەکانیان دەگەڕێنێتەوە، ئەوەش دوای زیادکردنی چەند بڕگەیەک لەسەر داواکاریی سوننەکان بۆ قەرەبووکردنەوەی ئەوانەی کە زەوییەکانیان لێ وەردەگیرێتەوە.

 

وێنە گەوەکە: لە دانیشتنی ڕۆژی یەکشەممەی پەرلەمانی عێراق بەهۆی ناڕەزایەتی سوننەکانەوە بۆ جاری پێنجەم دەنگدان لەسەر پرۆژەیاسای گەڕاندنەوەی خاوەندارێتی مووڵک و ماڵی داگیرکراو بەفەرمانی ئەنجوومەنی ناسراو بە "قیادەی سەورە"ــی هەڵوەشاوە نەدرا، کە لە بەرژەوەندی جووتیارانی کورد بوو لە بەشێک لە ناوچە کوردستانییەکانی دەرەوەی هەرێمی کوردستان.

 

زانیاریی بەدەستهاتوو: دەروون مەلا ناجی، پەیامنێری ئاڤا لە بەغدا ڕایگەیاند، درەنگانی شەوی ڕابردوو کۆبوونەوەیەکی گرنگ لە ماڵی موحسن مەندەلاوی، سەرۆکی پەرلەمانی عێراق بە وەکالەت بەڕێوەچوو، لە کۆبوونەوەکەدا هەریەک لە د.شاخەوان عەبدوڵڵا، جێگری سەرۆکی پەرلەمان، بە نوێنەرایەتی پارتی، د.خالد شوانی، وەزیری دادی عێراق بە نوێنەرایەتی یەکێتی و محەممەد تەمیم، بە نوێنەرایەتی سوننەی کەرکووک و ژمارەیەک لە سەرۆکی فراکسیۆنەکان بەشداربوون.

 

زانیاریی زیاتر: کۆبوونەوەکە نزیکەی دوو کاتژمێری خایاندووە، لەسەر تەواوی ئەو پرس و بابەتانەی کە لە کۆبوونەوەی ڕۆژی یەکشەممەی ئەنجوومەنی نوێنەران گفتوگۆی لەسەر کرا، گەیشتوونەتە ڕێککەوتنێکی سەرەتایی بۆ ئەوەی کاتێک دانیشتنی پەرلەمان دەستی پێکردەوە ئەو پرسانەی کە کێشەیان لەسەر هەبوو بەبێ کێشە تێپەڕێنرێت.

 

ڕێککەوتنەکە بەم جۆرەیە: سوننەکان داوایان کردووە حکومەتی عێراق قەرەبووی ئەو جووتیارانە بکاتەوە کە زەوییەکانیان لێ وەردەگیرێتەوە، داوا دەکەن وەزارەتی دارایی، بەرگری و داد بەشێک بن لە پرۆسەکە بۆ ئەوەی ئەو بڕگانە لە پرۆژەیاساکەدا جێی بکرێتەوە. تا ڕاددەیەکی باش لێکتێگەیشتن دروست بووە، چاوەڕوان دەکرێت لە ڕۆژانی ئاییندە ئەگەر دانیشتنەکانی پەرلەمان بەڕێوەچوو دەنگ لەسەر ئەو پرۆژە یاسایە بدرێت.