کاردانەوەی عێراق لەسەر بەزاندنی ئاسمانی وڵاتەکەی لەلایەن ئیسرائیلەوە

ئاڤا نیوز

 

وتەبێژی حکومەتی عێراق ڕایگەیاند، ئیسرائیل بۆ هێرش کردنە سەر ئێران، ئاسمانی وڵاتەکەی بەکارهێناوە بەوەش ئاسمان و سەروەریی عێراقی پێشێلکردووە، جەختیش دەکاتەوە کە بەغدا بۆ وەڵامدانەوەی ئەو پێشێلکارییە لە هەموو ئاستەکاندا کاردەکات.

 

وێنە گەورەکە: بەرەبەیانی ڕۆژی شەممە 26-10-،2024 وەک وەڵامێک بۆ هێرشە مووشەکییەکەی تاران بۆ سەر تەلئەڤیڤ لە سەرەتای مانگی ئۆکتۆبەر، ئیسرائیل هێرشیکردە سەر دامەزراوە سەربازییەکانی ئێران.

 

ڕاگەیێنراوی فەرمی: باسم عەوادیی، گوتەبێژی حكومەتی عێراق لە ڕاگەیێنراوێکدا ئەوەی خستووەتەڕوو، عێراق دژی ئیسرائیل، بەفەرمی ناڕەزایی گەیاندە سکرتێری گشتی نەتەوە یەکگرتووەکان و ئەنجوومەنی ئاسایش و تیایدا جەختکراوەتەوە کە ئیسرائیل ئاسمان و سەروەریی عێراقی پێشێلکردووە و لەڕێگەیەوە هێرشیکردووەتە سەر ئێران.

 

هاوکات سەرۆکوەزیرانی عێراقیش وەزارەتی دەرەوەی ڕاسپاردووە لەسەر ئەو "پێشێلکارییەی ئیسرائیل"، لەگەڵ ئەمریکا لەپەیوەندیدا بێت، ئەویش لە چوارچێوەی ڕێککەوتنی ستراتیژیی نێوان بەغدا و واشنتن و وەک بەشێک لە پابەندییەکانی ئەمریکا بۆ پاراستنی سەروەریی و ئاسایشی عێراق.

 

لە بەشێکی دیکەی پەیامەکەی حکومەتی عێراقدا ئاماژە بە وەڵامدانەوەی بەزاندنی ئاسمانی وڵاتەکە کراوە و دەڵێت، "بۆ وەڵامدانەوەی ئەو پێشێلکارییە لە هەموو ئاستەکان کاردەکەین، ڕێگەشنادەین ئاسمانی وڵاتەکەمان بۆ هێرش کردنە سەر هیچ وڵاتێک بەکاربهێنرێت، لە هەمان کاتیشدا پێداگرین لەسەر سیاسەتی خۆمان کە بریتییە لە پاراستنی ئارامی ناوچەکە و چارەسەری کێشەکان بە گفتوگۆ".