لە هەولێر ئامادەكاری بۆ وەرزی بارانبارین و زستانی ئەمساڵ دەكرێت

ئاڤا نیوز

 

فەرمانگە پەیوەندیدارەكانی پارێزگای هەولێر بە سەرپەرشتی پارێزگار كۆدەبنەوە و ئامادەكاریی بۆ وەرزی بارزانبارین و زستانی ئەمساڵ دەكەن.

 

وێنە گەورەكە: لە ساڵانی ڕابردوو، بەهۆی بارانبارینی زۆرەوە لە چەند گەڕەك و شوێنێكی شاری هەولێر لافاو دروست دەبوو و زیانی دارایی و گیانی لێدەكەوتەوە، بەڵام بە فەرمانی سەرۆكوەزیران مەسرور بارزانی، چەند پڕۆژەیەك بۆ كەمكردنەوەی زیانەكان و دروستنەبوونی لافاو جێبەجێكراون و دوو ساڵە لە كەمترین شوێن ئاوی باراناو كۆدەبێتەوە.

 

ڕاگەیێنراوی فەرمی: بەپێی ڕاگەیێنراوێكی پارێزگای هەولێر، لە كۆبوونەوەكەدا سەبارەت بە وەرزى بارانبارین و زستانى ئەمساڵ و ئامادەكاریی فەرمانگەكان، پارێزگارى هەولێر سەرجەم فەرمانگە پەیوەندیدارەكانى ڕاسپارد بۆ گرتنەبەری ڕێوشوێنی پێویست و ئامادەكاریی زیاتر بەمەبەستی ڕێگریكردن لە هەر بارێکی نەخوازراو و چارەسەركردنی ئەو خاڵە لاوازانەی کە دەبنە هۆی دروستبوونی پەنگخواردنەوەى ئاوی زیادە.

 

لەلایەكی دیكەوە: پارێزگاری هەولێر فەرمانگە پەیوەندیدارەكانی ڕاسپارد كە بەردەوامی بە پاککردنەوەى مەنهۆڵەکان و خاوێنكردنەوەی ئاوەڕۆكان لە شەقامە گشتییەکان و کوچە و کۆڵانەکانی گەڕەکانى شار و پاککردنەوەى کەند و ڕێڕەوەکانى ئاوى باران بدەن.