خەڵکی خورماڵ داوا دەکەن کەسێک لەسەر پشکی پارتی ببێتە قایمقامی قەزاکەیان

ئاڤا نیوز

 

دوای ئەوەی لە کابینەی نۆیەمی حکومەتی هەرێمی کوردستاندا خورماڵ وەک دووەم قەزای پارێزگای هەڵەبجە دوای قەزای ناوەندی دامەزرا و هەموو ڕێکارە یاساییەکانی تەواو بوو، خەڵکی ناوچەکە داوا دەکەن لە چوارچێوەی ڕێکخستنەوەی ئیدارەی خۆجێیی پارێزگای هەڵەبجەدا، قائیمقامێکی پارتی بۆ قەزاکەیان دابنرێت.

بۆچی گرنگە: دەیان ساڵە خورماڵ ناحیەیە، تا ئەم دواییەش گەڕەکەکانی قوڕو چڵپاو بوو قیرتاو نەکرابوون، خزمەتگوزاری پێویستیشی بەراورد بە شوێنەکانی دیکە پێشکەش نەکرابوو، خەڵکەکەی ئیدارەی پارێزگای هەڵەبجە و حیزبی دەسەڵاتداری ئەو ناوچەیەیان بەکەمتەرخەم دەزانی بۆ خزمەتنەکردنی.

 

زانیاریی زیاتر: بەبڕیاری سەرۆکوەزیران مەسروور بارزانی خورماڵ کرایە قەزا، خۆی بە تایبەت سەردانی قەزا تازەکەی کرد، لە پلاندایە کۆمەڵێک پڕۆژەی بۆ ڕابگەیێندرێت، بەم دواییانەش شاندێک لە هەولێرەوە سەردانی خورماڵیان کردووە و سەرقاڵی وردبینی و لێکۆڵینەوەن بۆ ئەوەی پڕۆژەیەکی گەشتیاریی گەورە هاوشێوەی کۆڕنیشی زاخۆ لای مزگەوتی گەورە کە سەرچاوەیەکی ئاویشی لێیە و پێی ئەڵێن "گەنجان"، دروست بکەن.

 

کاریگەری و لێکەوتەکان: لە هەڵبژاردنی پەرلەمانی کوردستان پارتی لە سنووری پارێزگای هەڵەبجە توانی لە کۆی سێ کورسی پارێزگاکە، کورسییەک بۆ خۆی مسۆگەر بکات. ئێستا دانیشتووانی خورماڵ بە فرسەتی ئەزانن و داوا دەکەن پۆستی قایمقامی خورماڵ بدرێت بە کەسێکی پارتی بۆ ئەوەی خزمەتیان بکات.