سەرۆکوەزیران بارزانی: هیوادارم هەموو لایەک ئەنجامی هەڵبژاردن قبوڵ بکەن

ئاڤا نیوز

سەرۆکوەزیران مەسرور بارزانی داوا دەکات دوای ڕاگەیاندنی ئەنجامی کۆتایی هەڵبژاردن هەموو لایەنە سیاسییەکان ئەنجامەکان قبوڵ بکەن، وەکو جێگری سەرۆکی پارتیش جەختی کردەوە، وەکو براوەی هەڵبژاردن بە بەڵێنەکانی بانگەشەی هەڵبژاردن پابەند دەبن و ڕاستگۆ دەبن لەگەڵ خەڵکی کوردستان.

وێنە گەورەکە: لە هەولێر دەیەمین دیداری مێری بە ناونیشانی (بەرەو حکومڕانی دروست و خۆشگوزارنی) بەڕێوەدەچێت. مەسرور بارزانی، سەرۆکوەزیران و جێگری سەرۆکی پارتی بە ناونیشانی (ھەرێمی کوردستانی عێراق دوای ھەڵبژاردن: ستراتیژ و ئەولەویەتەکان) بەشداری لە پانێلێکدا کرد.

لێدوانی فەرمی: لە سەرەتای قسەکانیدا سەرۆکوەزیران بەڕێوەچوونی هەڵبژاردنی بە پرۆسەیەکی گرنگ وەسف کرد و سەرکەوتنیشی بۆ هەموو ئەو لایەنە سیاسییانە گەڕاندەوە کە بەشدارییان کرد. ئاماژەی بۆ ئەوەش کرد بەشداریی ڕێژەی 72%ی دەنگدەران لە هەڵبژاردن، دەرخەری ئەوەیە خەڵکی هەرێمی کوردستان باوەڕیان بە پڕۆسەی دیموکراسی هەیە.

لەلایەکی دیکەوە: سەرۆکوەزیران مەسرور بارزانی ئاماژەی بە هەڵوێستی بەشێک لە لایەنەکان کرد لەبارەی ئەنجامەکانی هەڵبژاردن و گوتی: "هەقیقەت جیاوازە لە پێشبینی، زۆر لایەن پێش هەڵبژاردن لەسەر بۆچوونێک بوون، دوای بڵاوبوونەوەی ئەنجامەکان بۆچوونێکی دیکەیان هەیە، هەرچەندە تێبینیش هەبووبێت، هیوادارم هەموو لایەنەکان ئەنجامەکانی هەڵبژاردن قبوڵ بکەن و بە بەشداریی لایەنە نێودەوڵەتییەکان دیار بوو کە هەڵبژاردنێکی زۆر باش بووە".

گۆشەیەکی دیکە: لەبارەی پێکهێنانی کابینەی نوێیی حکومەت، سەرۆکوەزیران جەختی کردەوە هەرکەسێک بیەوێت بەشداربێت لە حکومەت دەبێت وەڵامدەرەوەی ویست و خواستی خەڵک بێت.

ڕاستەوخۆ؛ سەرۆکوەزیران مەسرور بارزانی لە دیداری مێری قسە دەکات