شاخەوان عەبدوڵڵا: لەسەر سەرژمێریی گشتی بەڵێنی جێبەجێکردنی داواکارییەکانیان پێداوین

ئاڤا نیوز

 

جێگری سەرۆکی پەرلەمانی عێراق ڕایدەگەیێنێت ئەوان وەکو هەرێمی کوردستان چەند مەرجێکیان هەیە لە پرۆسەی سەرژمێریی گشتی دانیشتووان و ئاماژە بۆ ئەوە دەکات کە بەڵێنی ئەوەیان پێداون داواکارییەکانیان جێبەجێ بکەن.

 

وێنە گەورەکە: کورد تێبینی لەسەر پرۆسەی سەرژمێریی گشتیی دانیشتووان هەیە بە تایبەت لە ناوچە کوردستانییەکانی دەرەوەی هەرێمی کوردستان، بۆ ئەو مەبەستەش ماوەی چەند ڕۆژێکە شاندێکی باڵای  حکومەتی هەرێمی کوردستان بەغدایە.

 

لێدوانی فەرمی: د.شاخەوان عەبدوڵڵا، جێگری سەرۆکی پەرلەمانی عێراق لە کۆنگرەیەکی ڕۆژنامەوانیدا ڕایگەیاند: لەسەر بابەتی سەرژمێری هەندێک هەنگاوی باشمان ناوە، کۆبوونەوەیەک کراوە، ئەمڕۆش کۆبوونەویەکی دیکەی گرنگ دەکرێت لەسەر ئاستی باڵا لە عێراق بە ئامادەبوونی ئێمەو بەرپرسانی حکومەتی هەرێمی کوردستان، ئەو کۆبوونەوەیەش تەواوکەری کۆبوونەوەکانی دیکەیە.

 

زانیاریی زیاتر: بە گوتەی شاخەوان عەبدوڵڵا، "داواکاریی ئێمە ئەوەیە بۆ نموونە کەرکووکیەک لەهەولێر یان سلێمانی یان هەر شوێنێک بێت لەسەر کەرکووک ئەژمار بکرێت، یان خەڵکێک هاتووەتە کەرکووک لەسەر شارەکەی خۆی ئەژمار بکرێت، بەڵێنی ئەوەشیان داوە جێبەجێی بکەن، ئەگەر جێبەجێش نەکەن بڕیاری دیکە دەدەین".

 

ئەوەی پێویستە بیزانیت: کارەکانی ژمارە لێدان و گەمارۆسازی بۆ سەرژمێریی گشتی لە عێراق لە سەرەتای مانگی ئەیلوولی ئەمساڵ دەستپێکردووە و بڕیارە تاوەکو یەکی تشرینی دووەم بەردەوام بێت، لە هەرێمی کوردستانیش لە 1-10-2024وە دەستیپێکردووەو تاوەکو ئێستا بەردەوامە. بڕیاریشە لە 20-11-2024 سەرژمێریی گشتی لە عێراق و هەرێمی کوردستان بکرێت.