بەهۆی نالەباری کەشوهەوا پارێزگا و ئیدارە سەربەخۆکان لەبارەی پشوو بڕیار دەدەن

ئاڤا نیوز

 

بەهۆی نالەباری کەشوهەوا سبەی یەکشەممە لە چەند ناوچەیەک بەتایبەت لە ناوەندەکانی خوێندن کراوەتە پشوو، لە هەندێک ناوچەش پشوو نابێت و دەوام ئاسایی دەبێت.

وێنە گەورەکە: بەپێی پێشبینییەکانی کەشوهەوا، ئەو شەپۆلە بارانبارینەی هەرێمی کوردستانی گرتووەتەوە، لە ئەمشەوەوە تاوەکو سبەی ئێوارە چڕ دەبێتەوە، لە هەندێک شوێن مەترسی کۆبوونەوەی ئاو و لافاو هەیە.

 

چیرۆکی سەرەکی: وەزارەتەکانی پەروەردە و  خوێندنى باڵا لە دوو ڕاگەیێنراوی جیادا ڕوونکردنەوەیان لەبارەی ڕاگەیاندنی پشوو دا. وەزارەتی پەروەردە بەڕێوەبەرایەتییەکانی بە بڕیاری پارێزگا و ئیدارە سەربەخۆکان پابەند کرد و داوای کرد ئەوان چ بڕیارێکیان دا جێبەجێی بکەن، وەزارەتی خوێندنی باڵاش زانکۆکانی بۆ ڕاگەیاندنی پشوو سەرپشک کرد.

ئەوەی پێویستە بیزانیت: بڕیاری پارێزگا و ئیدارە سەربەخۆکان بەمشێوەیە:

 

کەرکووک: ڕێبوار تەها، پارێزگاری کەرکووک ڕایگەیاند: سبەی لە سەرجەم قوتابخانە بنەڕەتی و ناوەندی و دواناوەندییەکان و زانکۆ و پەیمانگە حکومی و تایبەتەکان پشوو دەبێت، تەنیا ئەو قوتابیانە نەبێت کە تاقیکردنەوەی خولی سێیەمیان هەیە پشوو نایانگرێتەوە و دەبێت دەوام بکەن.

 

هەولێر: پارێزگای هەولێر لە ڕاگەیێنراوێکدا ڕایگەیاند: هیچ هۆکارێک بەپێویست نابینن تاوەکو سبەی یەکشەممە بکرێتە پشوو، هەموو لایەک ئاگادار دەکەینەوە بەیانی لە سەرجەم فەرمانگە و دامودەزگاکان دەوام ئاسایی دەبێت و پشوو نابێت.

 

سلێمانی: هەڤاڵ ئەبوبەکر، پارێزگاری سلێمانی بە ئاڤا نیوزی گوت: هێشتا بڕیارمان نەداوە، هەر بڕیارێک بدەین بە فەرمی ڕایدەگەیێنین و هەموو لایەک ئاگادار دەکەینەوە.

 

دهۆک: سەرچاوەیەک لە ئەنجوومەنی پارێزگای دهۆک بە ئاڤای ڕاگەیاند: تا ئێستا هیچ بڕیارێک لەبارەی پشووی سبەی دامودەزگا حکومییەکانی سنووری پارێزگای دهۆک نەدراوە و دەوام ئاسایی دەبێت.

 

سۆران: هەڵگورد شێخ نەجیب، سەرپەرشتیاری  ئیدارەی سەربەخۆی سۆران بە ئاڤا نیوزی ڕاگەیاند: سبەی یەکشەممە دەوام ئاساییە و لە هیچ فەرمانگە و ناوەندێکی خوێندن ناکرێتە پشوو.

ڕاپەڕین: هیوا قەرەنی، سەرپەرشتیاری ئیدارەی سەربەخۆی ڕاپەڕین بە ئاڤا نیوزی ڕاگەیاند، سبەی یەکشەممە لە باخچەی ساوایانەوە تاوەکو پۆلی نۆی بنەڕەتی پشوو دەبێت، ئەگەر کەشوهەوا خراپتر بوو ئەوا بڕیارەکەیان دەگۆڕن و  لە هەموو فەرمانگەکان پشوو ڕادەگەیێنێن. 

 

زانکۆی ڕاپەڕین سبەی کردە پشوو و لە ڕاگەیێنراوێکدا ڕایگەیاند،  لەپێناو پاراستنى سەلامەتى گیانى خوێندکاران و مامۆستایان و فەرمانبەران، سبەی یەکشەممە لە زانكۆی راپەڕین پشووی فەڕمی خوێندن و دەوامی كارگێڕی دەبێت.

سەیدسادق: بەڕێوەبەرایەتیی پەروەردەی سەیدسادق لە ڕاگەیێنراوێکدا ڕایگەیاند، دوای گفتوگۆ لەگەڵ قائیمقامی قەزای سەیدسادق، لەپێناو سەلامەتی قوتابیان و خوێندکاران، بڕیارمان داوە بەهۆی ئەو شەپۆلە بارانبارینەی ناوچەکەی گرتووەتەوە، سبەی یەکشەممە لە سەرجەم ناوەندەکانی خوێندن پشوو بێت. 

 

هەڵەبجە: سۆران عومەر، بەڕێوەبەری پەروەردەی هەڵەبجە لە ڕاگەیێنراوێکدا ڕایگەیاند: سبەی لە ناوەندەکانی خوێندن لە پارێزگای هەڵەبجە پشووە. هاوکات بەڕێوەبەرایەتیی گشتیی پەروەردەی هەڵەبجەی شەهید لە ڕاگەیێنراوێکدا لە ناوەندەکانی خوێندن پشووی ڕاگەیاند.