سەرۆکی لەکارلادراوی ئەنجوومەنی پارێزگای دیالە دەگەڕێنرێتەوە

ئاڤا نیوز

 

کێشە سیاسییەکانی ئەنجوومەنی پارێزگای دیالە فراوانتربوون و لەگەڵ سوێندخواردنی سەرۆکی نوێی ئەنجوومەنەکە لەبەردەم دادگای تێهەڵچوونەوە، دادگای کارگێڕییش فەرمانێکی دەرکرد و سەرۆکی لەکار لابراوی ئەنجوومەنی پارێزگای دیالەی بۆ سەر پۆستەکەی گەڕاندەوە.

 

وێنە گەورەکە: 29ی مانگی ڕابردوو ئەنجوومەنی پارێزگای دیالە لە کۆبوونەوەیەکدا دەنگیدا لەسەر وەرگرتنەوەی متمانە لە عومەر کروی، سەرۆکی ئەنجوومەنەکە و لە پۆستەکەی دووریی خستەوە.

هۆکارە زانراوەکان: هۆکاری دووخستنەوەی لە پۆستەکەی دوای ئەوەبوو کە ئەنجوومەنی پارێزگای دیالە دەنگیدا لەسەر گۆڕینی ژمارەیەک بەڕێوەبەری یەکە کارگێڕییەکان، ئەوەش ناکۆکی لەنێوان لایەنەکاندا قوڵکردەوە و لە چەند ناوچەیەکی پارێزگاکەش دژی گۆڕانکارییەکان خۆپیشاندان کران، بەهۆی ئەوەی زۆربەی بەڕێوەبەرەکان خزم و کەسوکاری پەرلەمانتار و ئەندامانی ئەنجوومەنەکە بوون.

 

ڕاگەیێنراوی فەرمی: عومەر کروی، سەرۆکی ئەنجوومەنی پارێزگای دیالە لە یەکەم پەیامیدا دوای گەڕانەوەی بۆسەر پۆستەکەی ڕایگەیاند: دادگا سەلماندی کە پێویستە خواستە سیاسییەکان کۆتاییان پێبهێنرێت و بڕیارەکانی ئەنجوومەنی پارێزگاش دەبێت لەسەر بنەمای یاسا و پەیڕەوی ناوخۆ دەربکرێن.