هۆشدارییەک لە موقتەدا سەدرەوە بۆ حکومەتی عێراق

ئاڤا نیوز

ڕێبەری ڕەوتی نیشتمانی شیعە لە پەیامێکدا هۆشداریی دەداتە حکومەتی عێراق، کە خۆی نەخزێنێتە نێو پرسی چارەسەری "دوو دەوڵەت" بۆ فەڵەستین و ئەمە بە پلانی ڕۆژئاوا دەزانێت بۆ ڕیسواکردنیان و دەشڵێت، ئێمە دان بە ڕێککەوتنە بەریتانی و ڕۆژئاواییەکان نانێین.

 

وێنە گەورەکە: ئەو هۆشدارییەی سەدر لەکاتێکدایە 11ی ئەم مانگە سەرۆکوەزیرانی عێراق لە ڕیازی پایتەختی سعودیە بەشداری لە لوتکەی عەرەبی و ئیسلامی تایبەت بە غەززە و لوبنان دەکات، باس لەوە دەکرێت لە پەیامی کۆتاییدا خۆی لوتکەکە داوای هەنگاوی کردەیی بکات بۆ چارەسەری دوو دەوڵەت لەنێوان ئیسرائیل و فەڵەستین.

 

پەیامی فەرمی: موقتەدا سەدر، ڕێبەری ڕەوتی نیشتمانی شیعە لە پەیامێکدا کە لە پەڕەی فەرمی خۆی لە تۆڕی ئێکس بڵاویکردووەتەوە دەڵێت: پێش ئەوەی تەورەکە بەر سەرتان بکەوێت، وەک ڕۆژئاوا پلانی داناوە بۆ ڕیسواکردنمان. هۆشداریی بە حکومەتی عێراق دەدەم کە خۆی نەخزێنێتە نێو پرسی چارەسەری دوو دەوڵەت بۆ فەڵەستین.

 

لەهەمان كاتدا: سەدر لە درێژەی پەیامەکەیدا ئاماژە بۆ ئەوە دەکات کە هەڵوێستی ئەوان وەک "شیعەی محەممەد و عەلی سەلامی خودایان لەسەر بێت ڕوونە، ئەویش دەوڵەتێکە بۆ فەلەستین لە دەریاوە بۆ ڕووبار و پایتەختەکەی قودس بێت. دانیش بە ڕێککەوتنە بەریتانی و ڕۆژئاواییەکان نانێین".

 

بەتەنیشت ئەم بابەتەوە: سەدر هۆشداریی دەدا لەوەی ئەگەر بێت و حکومەتی عێراق دەستوەردان بکات، ئەوا ئەو یاسایە دەیگرێتەوە کە ئاسیکردنەوەی پەیوەندی لەگەڵ "ئیسرائیل" بە تاوان دانراوە، هاوکات پەیامێکیش بۆ سعودیە دەنێرێت و هیوادارە سعودیە گرنگی بەم بابەتە بدات و "دان بە قەوارەی زایۆنیدا نەنێت".