عێراق بڕیاری "تەوتین"ی مووچەی فەرمانبەرانی کەرتی تایبەت دەدات

ئاڤا نیوز

 

لەسەر ڕاسپاردەی سەرۆکوەزیرانی عێراق کار بۆ جێبەجێکردن "تەوتین"ی مووچەی فەرمانبەرانی کەرتی تایبەت هاوشێوەی کەرتی حکومی دەکرێت و وادەیەکیش بۆ کۆتاییهێنان بە مامەڵەکردن بە پارەی کاش دیاری دەکرێت.

 

وێنە گەورەکە: بۆ جێبەجێکردنی پرۆسەی چاکسازی دارایی و ئابووری، سەرۆکوەزیرانی عێراق داوا دەکات کۆمەڵێک هەنگاو بنێت بۆ بەرزکردنەوە و پەرەپێدانی سیستەم و خزمەتگوزارییەکانی پارەدانی ئەلیکترۆنی.

 

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند: سەرۆکوەزیران فەرمانی کردووە بە کارکردن بۆ تەوتینی مووچەی فەرمانبەرانی کەرتی تایبەت هاوشێوەی کەرتی حکومی و ڕاسپاردنی وەزارەتی کار و کاروباری کۆمەڵایەتی و بانکی ناوەندی عێراق، بە بەشداری ژمارەیەک دامەزراوەی کەرتی تایبەت، بۆ ئامادەکردنی میکانیزمێکی گونجاو بۆ ئەم مەبەستە.

 

زانیاریی زیاتر: بەپێی ڕاگەیێنراوەکە؛ وەزارەتەکان و سەرجەم دامودەزگاکانی حکومەت دەستبەرداری پارەدان بن بە شێوەی نەختینە و کار بە شێوازی پارەدانی ئەلیکترۆنی بکەن لەڕێگەی پێشکەشکردنی پلانێکی یەکگرتوو کە لەلایەن هەر وەزارەتێک یان دامەزراوەیەکی حکومییەوە پێش 31ی کانوونی دووەمی 2024. بەمەرجێک دوایین وادە بۆ جێبەجێکردنی ڕاستەقینەی ئەم کارە نەگاتە 1ی تەمموزی 2025.