دادگای فیدراڵی تاوتوێی چەند دۆسیەیەک پەیوەست بە ئەنجووومەنی پارێزگای کەرکووک دەکات

ئاڤا نیوز

 

دادگەی باڵای فیدراڵیی عێراق لەسەر پێنج دۆسیەی پەیوەست بە ئەنجوومەنی پارێزگای کەرکووک کۆدەبێتەوە، سکاڵاکاران داوای هەڵوەشانەوەی ئەو دانیشتنە دەکەن کە پارێزگار و سەرۆکی ئەنجوومەنی تێدا هەڵبژێردرا، هاوکات داوای هەڵوەشانەوەی مەرسومی کۆماریش دەکەن کە بۆ ڕێبوار تەها وەک پارێزگاری کەرکووک دەرکراوە.

 

وێنە گەورەکە: ناڕەزایەتیی بەشێک لە لایەنە بەشدارنەبووەکانی کۆبوونەوەی 10ی ئابی هۆتێل ڕەشیدی بەغداو هەڵبژاردنی پارێزگار و سەرۆکی ئەنجوومەنی پارێزگای کەرکووک و دەرکردنی مەرسومی کۆماری بۆ دەستبەکاربوونی پارێزگاری کەرکووک بەردەوامە، بۆ ئەو مەبەستەش دادگەی باڵای فیدراڵیی عێراق تاوتوێی چەند دۆسیەیەک لەوبارەیەوە دەکات.

 

بڵاوکراوەی فەرمی:  بەپێی خشتەی دانیشتنەکانی سبەی چوارشەممە 6-11-2024ـی دادگەی باڵای فیدراڵیی عێراق، تاوتوێی شەش دۆسیە دەکرێت کە پێنجیان پەیوەستن بە ڕێککارەکانی هەڵبژاردنی پارێزگار و سەرۆکی ئەنجوومەنی پارێزگای کەرکووک.

 

پێدراوە ڕاستییەکان: سکاڵایەکان لەلایەن هەر یەک لە ڕاکان سەعید و سەوسەن عەبدولواحید، ئەندامانی ئەنجومەنی پارێزگای کەرکوک و حەسەن توران، سەرۆکی بەرەی تورکمانی عێراقی تۆمارکراون. سکاڵاکانیشیان دژ بە ڕێبوار تەها و هەشت ئەندامی دیکەی ئەنجوومەنی پارێزگای کەرکووک و سەرۆککۆماری عێراقە.

 

ئەوەی لەوبارەیەوە دەگوترێت: سکاڵاکاران داوای هەڵوەشاندنەوەی دانیشتنی ڕۆژی 10-8-2024 و ئەنجامەکانی هەڵبژاردنی پارێزگار و سەرۆکی ئەنجوومەنی پارێزگا دەکەن، هاوکات داوای هەڵوەشانەوەی مەرسومی کۆماری ژمارە (83 ی ساڵی 2024) دەکەن کە بریتییە لە "دامەزراندنی ڕێبوار تەها مستەفا بۆ پۆستی پارێزگاری کەرکووک".

 

ئەوەی پێویستە بیزانیت: پێشتر و لە ڕۆژی  20-8-2024 دادگای باڵای فیدراڵی عێراق سكاڵایەکی بەرەی تورکمانی دژی پێکهێنانی حکومەتی خۆجێی کەرکووک ڕەتکردەوە.

 

باکگراوند: 10-8-2024 ئەنجوومەنی پارێزگای کەرکووک بە ئامادەبوونی نۆ ئەندام لە کۆی 16 ئەندام لە بەغدا کۆبووەوە، تێیدا ڕێبوار تەها لە پشکی یەکێتی وەک پارێزگار و محەممەد حافز لە پێکهاتەی عەرەب وەک سەرۆکی ئەنجوومەنی پارێزگا  هەڵبژێردران.