سەرۆکوەزیرانی عێراق پیرۆزبایی لە ترەمپ دەکات

ئاڤا نیوز

 

سەرۆکوەزیرانی عێراق پەیامی پیرۆزبایی ئاڕاستەی دۆناڵد ترەمپ، سەرۆکی نوێی ئەمریکا دەکات و پابەندبوونی عێراق بە پتەوکردنی پەیوەندیی دووقۆڵی لەگەڵ ئەمریکا دەکاتەوە و ئاماژە بەوە دەکات چاوەڕێ دەکەن ئەم قۆناغە ببێتە سەرەتای بۆ قووڵکردنەوەی هاوکاریی نێوانیان.

 

وێنە گەورەکە: ڕۆژی 5-11-2024 هەڵبژاردنی ئەنجوومەنی پیران و سەرۆکایەتیی ئەمریکا ئەنجامدرا، بە گوێرەی ئەنجامە بەراییەکان دۆناڵد ترەمپ بە ڕێژەیەکی بەرچاو لە پێش کامالا هاریسەوەیە.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق لە تۆڕی ئێکس پیرۆزبایی سەرکەوتنی لە دۆناڵد ترەمپ و جەیمس دەیڤید ڤانس جێگرەکەی و سەرکەوتنی بەڕێوەچوونی هەڵبژاردنەکەی لە گەلی ئەمریکا کرد و ڕایگەیاند: پابەندبوونی عێراق بە باشترکردنی پەیوەندیی دووقۆڵی لەگەڵ ئەمریکا دووپات دەکەینەوە لەسەر بنەمای ڕێزگرتنی یەکتر و بەرژەوەندیی هاوبەش.

 

"چاوەڕێ دەکەین ئەم قۆناغە نوێیە ببێتە سەرەتای قووڵکردنی هاوکاریی نێوانمان لە چەندین بوار بە شێوەیەک کە بەشدار بێت لە گەیشتن بە گەشەپێدانی بەردەوام و سوودی بۆ هەردوو گەلی دۆست هەبێت".

 

ئەوەی پێویستە بیزانیت: بەپێی ئەنجامی بەرایی دۆناڵد ترەمپ 71,016,426 دەنگی بەدەستهێناوە کە دەکاتە %51.0 کۆی دەنگەکان، هاوکات کامالا هاریس  66,106,745 دەنگ کە دەکاتە %47.5 کۆی دەنگەکان.