بەغدا ڕەزامەندی لەسەر خەرجکردنی 284 ملیار دینار بۆ هەرێمی کوردستان دەربڕی

ئاڤا نیوز

 

حکومەتی عێراق ڕەزامەندی لەسەر خەرجکردنی 284 ملیار دینار بۆ پارەی گەنمی جووتیارانی هەرێمی کوردستان دەربڕی. 

وێنە گەورەکە: لەکاتێکدا شەش مانگ بەسەر دەستپێکردنی پرۆسەی ڕادەستکردنی گەنم تێپەڕیوە، هێشتا حکومەتی عێراق تەواوی پارەی بۆ جووتیارانی هەرێمی کوردستان خەرج نەکردووە.

نووسراوی فەرمی: نووسینگەی محەممەد شیاع سوودانی، سەرۆکوەزیرانی عێراق بە نووسراوێک کە لە ڕێککەوتی 30-10-2024 دەری کردووە، داوای خەرجکردنی پارەی گەنمی جووتیارانی هەرێمی کوردستانی بۆ ساڵی 2024 ئاراستەی ئەمیندارێتی گشتیی ئەنجوومەنی وەزیران کردووە.

لەلایەکی دیکەوە: نووسینگەی سوودانی بە نووسراوێکی دیکە داوای لە وەزارەتی بازرگانی عێراق کردووە ئاگاداریان بکاتەوە لەوەی پارەی گەنمی جووتیارانی هەرێمی کوردستان چەندی ماوە؟ لە وەڵامدا وەزارەتی بازرگانی بە نووسراوێک ڕایگەیاندووە 284 ملیار دینار ماوە پێیان بدرێت.

هەنگاوی داهاتوو: وەزارەتی بازرگانی ڕوونی کردووەتەوە، ئەگەر ئەو بڕە پارەیان لەلایەن وەزارەتی دارایی عێراقەوە بەدەست بگات، دەست بە دابەشکردنی دەکەن.