نەعیم قاسم: ئامانجی ئیسرائیل گۆڕینی نەخشەی ڕۆژهەڵاتی ناوەڕاستە

ئاڤا نیوز 

 

نەعیم قاسم، ئەمینداریی گشتی حزبوڵڵای لوبنان ڕەتی دەکاتەوە کە ئیسرائیل وادەیەک بۆ کۆتایی هاتنی شەڕ دیاری بکات و دەڵێت ئیسرائیل ئامانجییەتی کە لە ڕێگەی داگیرکردنی لوبنانەوە نەخشەی ڕۆژهەڵاتی ناوەڕاست بگۆڕێت.

 

لێدوانی فەرمی: نەعیم قاسم، ڕایگەیاند: بنیامین نەتانیاهۆ، سەرۆکوەزیرانی ئیسرائیل ڕەتیدەکاتەوە وادەیەک بۆ کۆتایی هاتنی شەڕ دیاری بکات، بەڵکو لەبەردەم پرۆژەیەکدایە کە لە دەرەوەی غەززە، لە فەڵەستین و لوبنان درێژدەبێتەوە بۆ ڕۆژهەڵاتی ناوەڕاست. 

 

ئەمینداریی گشتی حزبوڵڵای لوبنان جەختیش لەوە دەکاتەوە: نەتانیاهۆ ئامانجی لە هێرشەکانی بۆ سەر لوبنان سێ هەنگاوە، یەکەم کۆتایی پێهێنانی حیزبوڵڵایە لە ڕەگەوە، دووەم داگیرکردنی لوبنانە ئەگەر لە دووریشەوە بێت، هەنگاوی سێیەمیش ئەوەیە لە ڕێگەی هێرشکردن و داگیرکردنی لوبنانەوە نەخشەی ڕۆژهەڵاتی ناوەڕاست بگۆڕێت.

 

لەلایەکی دیکەوە: نەعیم قاسم ئاماژەی بەوەش کرد، نەتانیاهۆ وادەیەک بۆ کۆتایی هاتنی هێرشەکان دیاری ناکات، بەڵکو ئامانجەکان دیاری دەکات، چیتر گرنگ نییە شەڕەکە چۆن دەستیپێکردووە و بیانووەکان چین، بەڵکو گرنگ ئەوەیە کە لوبنان ڕووبەڕووی هێرشەکانی ئیسرائیل دەبێتەوە.

 

لە گۆشەیەکی دیکە: ئەمینداریی گشتی حزبوڵڵای لوبنان ئاشکرای کرد، نەتانیاهۆ بە نوێنەری ئەمریکا ئامۆس هۆکشتاینی گوتووە کە پڕۆژەکە بۆ گۆڕینی ڕۆژهەڵاتی ناوەڕاستە.