گرووپێکی عێراقی بۆ ئاڤا: هەڵوێستمان لەبارەی کردنەدەرەوەی هێزەکانی ئەمریکا نەگۆڕە

ئاڤا نیوز

 

گرووپێکی چەکداری عێراقی دەڵێت، سەرەڕای گەڕانەوەی دۆناڵد ترەمپ بۆ کۆشکی سپی کە هەڵوێستەکانی لە بایدن توندوتیژترن، بەڵام ئەوان پێداگرن لەسەر کردنەدەرەوەی هێزەکانی ئەمریکا لە عێراق.

 

وێنە گەورەکە: دوای دەرچوونی دۆناڵد ترەمپ و گەڕانەوەی بۆ کۆشکی سپی، لیژنەی ئاسایش و بەرگری لە پەرلەمانی عێراق مەترسی خۆی ناشارێتەوە کە گفتوگۆکانی پەیوەست بە کردنەدەرەوەی هێزەکانی ئەمریکا لە عێراق ڕووبەڕووی ئاستەنگی دەبێتەوە.

 
لێدوانی فەرمی: عەلی فەتلاوی، سەرکردە لە گرووپی چەکداریی ئەنساروڵڵا ئەوفیا بەئاڤا نیوزی گووت: گرووپە چەکدارەکان بەلایانەوە گرنگ نییە کێ سەرۆکی ئەمریکایە و ئەوان بۆ ڕەتکردنەوەی بوونی هێزە بیانییەکان لە عێراق هەڵوێستیان نەگۆڕە، بۆ کردنە دەرەوەی ئەو هێزانەش ئامادەی هەموو ڕووبەڕووبوونەوەیەکن ئەگەر پێویست بکات. 

 

ئەوەشی خستەڕوو، "ئێستا دەرفەتێک دراوە بە حکومەتەکەی محەممەد شیاع سوودانی بۆ یەکلاییکردنەوەی ئەو بابەتە (کردنەدەرەوەی هێزە بیانییەکان) لەڕێگەی گفتوگۆ و ڕێکاری دیپلۆماسییەوە".

 

لەلایەکی دیکەوە: ئەو سەرکردەیەی گرووپی ئەنساروڵڵا ئەوفیا گوتی: "ترەمپ لە چاو سەرۆکی پێشخۆی بیرۆکەی توندڕەوی زیاتری هەیە، بەڵام ئەوە نابێتە هۆکاری ئەوەی کە بەردەوام نەبین لە داوای کردنەدەرەوەی هێزەکانی ئەو وڵاتە و یاخود ئاستەنگی بۆ ئەم بابەتە دروستبکرێت. دەشڵێن گرووپە چەکدارەکان کۆتایی بە ماوەی ئاگربەست دەهێنن (وەک ئاماژەیەک بەو دەرفەتەی بە سوودانی دراوە) و چاوەڕێی دەرئەنجامەکانی ئەو بابەتە لە ڕۆژانی داهاتوودا دەکەین".